Чăваш енре пурăнакансем хушшинче мессенджерсемпе социаллă сетьсенче çĕнĕ сас-хура сарăлчĕ. Вăл - цифрăллă тенкĕ ?цифровой рубль% çинчен. Хальхи укçапа усă курма пăрахаççĕ те граждансене пурне те хистесех цифрăлли çине куçараççĕ, теççĕ иккен.

Çакăн пек суя пĕлтерÿсенче ку çĕнĕлĕхе хирĕçлесе заявлени çырма, ăна Социаллă фонда е МФЦ-на килсе пама та сĕнеççĕ-мĕн. Кунашкал текстсенче саккунсенчен е нормативлă актсенчен илнĕ ?цифрăллă тенкĕне вуçех те пырса тивмен% вырăнсене те илсе кăтартма пултараççĕ.

Фейксем сарăлнине кура Наци банкĕн ĕçченĕсем ăнлантараççĕ: цифрăллă тенкĕ ахаль укçана ылмаштармасть, вăл - хушма тĕсĕ. Счета çын хăйĕн кăмăлĕ пулсан кăна тата банкăн мобильлĕ приложенийĕ урлă уçма пултарать. «Цифра енчĕкĕ» хăй тĕллĕн йĕркеленеймест, çыншăн ăна никам та уçаймасть.

- Çын хăй суйлать: цифрăллă тенкĕпе усă курмалла е çук. Вĕсем хăнăхнă укçана улăштармĕç. Енчен те вăл кирлĕ мар-тăк, цифрăллă енчĕке çын уçмасть кăна. Ку - кашнин харпăр хăй ирĕкĕ. Хирĕçлеме те Социаллă фонда е МФЦ-на нимле заявлени те çырмалла мар, - пĕлтереççĕ Раççей банкĕн уйрăмĕнчен - Чăваш Республикинчи Наци банкĕнчен.

Асăрхаттараççĕ: тĕрĕслемен çăлкуçсенчен тухакан суя информацие нихăçан та ĕненмелле мар. Сăлтавсăр пăлхану-пăшăрхану çуратмалла мар.

Ирина ЯКОВЛЕВА