Хĕлле гриппа тата ОРВИ-пе чирлекенсен йышĕ ÿсет.

Вирус инфекцийĕсем ерсен ытларах ачасем, аслă ăрурисем аптраççĕ. Чир-чĕр шала кайма та пултарать.

Пĕчĕк ачасен сывлăхĕшĕн инфекцисем хăрушă, мĕншĕн тесен иммун системи кун йышши вируссемпе тĕл пулман. Аслă ăрурисене тата шала кайнă чирсемпе - диабетпа, бронх астмипе, чĕре юн тымарĕсен чирĕсемпе - аптракансене илес пулсан вĕсен иммун системи хавшакрах.

Çавăн пекех пепке кĕтекен хĕрарăмсен, обществăлла транспорт, апатлану, суту-илÿ предприятийĕсен ĕçченĕсен, сывлăх хуралĕнче тăрăшакансен асăрхануллă пулмалла.

Чирсенчен чи лайăх хÿтĕлев - профилактика:

- эпидеми тапхăрĕ пуçланичченех грипран прививка тутармалла,

- харпăр хăй гигиенине пăхăнмалла, алăсене тăтăшах çумалла,

- пÿлĕмсене уçăлтармалла, урай час-часах çумалла, уçă сывлăшра ытларах пулмалла,

- гриппа, ОРВИ-пе чирлекенсем йышлă пулнă тапхăрта обществăлла вырăнсенче çÿрессинчен пăрăнмалла е çынсемпе сахалрах хутшăнмалла,

- сывă пурнăç йĕркине пăхăнмалла: çителĕклĕ çывăрмалла, «сывă» апат-çимĕç çимелле, ÿт-пĕве пиçĕхтермелле,

- обществăлла вырăнсенче сывлав çулĕсене ?сăмсана, çăвара% маскăпа хупламалла,

- С витаминпа пуян продуктсем ?клюква, брусника, лимон...% ытларах çимелле.

Харпăр хăй сывлăхĕшĕн тăрăшни чир-чĕре сирсе яма пулăшать.

Надежда НИКОЛАЕВА, Вăрнар район тĕп больницин инфекционисчĕ