Çĕр ĕçченĕсен уявĕччен район администрацийĕн пуçлăхĕ Андрей Тихонов, унăн пĕрремĕш заместителĕ Вячеслав Горбунов, Раççей ял хуçалăх центрĕн районти уйрăмĕн ертÿçи Вячеслав Алексеев, ял хуçалăх предприяти-организацийĕсен ертÿçисемпе специалисчĕсем акнă-лартнă уйсене пăхса çаврăннă. Çулçÿрев «Агрохмель» агрофирмăран тытăннă та «Броневик» хуçалăхпа вĕçленнĕ.

Пĕрчĕллĕ тата пăрçа йышши культурăсен кăçалхи лаптăкĕ 12131 гектар йышăнать, кĕрхисемпе пĕрле илсен – 19043 гектар таранах. Çав шутран пысăк пайне (62 процентне) тырăпа пăрçа валли уйăрнă. Выльăх апачĕлĕх культурăсем – 32 процент, техника культурисем – 5, çĕрулми – 1 процент.

– Выльăх-чĕрлĕх ĕрчетессипе тĕллевлĕ ĕçлетпĕр те тырпул ытларах акатпăр. Паллах, «иккĕмĕш çăкăр» валли те лаптăк уйăртăмăр, – терĕ «Янгорчино» кооператив председателĕ Геннадий Романов.

Районта рапс, соя, йĕтĕн, горчица, рыжик, хуратул тата ытти культура пусă çаврăнăшне çирĕппĕн кĕрсе пыраççĕ. Техника культурисен лаптăкĕсене те çултан-çул пысăклатаççĕ. Кăçал кăтарту 1569 гектарпа танлашнă. Кукуруза пуссисем 2571 гектара çити сарăлаççĕ, çав шутран тĕшĕлĕх акни – 700. Выльăх апачĕлĕх культурăсем – 9722 гектар.

Çанталăка пула çураки вăрăма тăсăлчĕ пулин те аграрисем ĕç тĕллевĕсене пурнăçланă. Çакна тĕрĕслев вăхăтĕнче те палăртнă. Комисси хуçалăхсен уйĕсене хак панă чухне калчасен шăтаслăхĕ, çăралăхĕ мĕнле шайра пулнине, çумкурăксем пуррипе çуккине тата ыттине пăхнă. Хăшпĕрисен кĕрхисем, теприсен çурхи культурăсем лайăх вăй илнĕ. Предприяти ертÿçисем ÿсентăран отраслĕнчи ÿсĕм-çитĕнÿсем пирки каласа панă, çĕр ĕç ăсталăхĕпе паллаштарнă.

Район уй-хирĕ тăрăх çаврăннă хыççăн чи лайăх хуçалăхсене палăртнă. «Мураты» кооператив (ертÿçи Геннадий Спиридонов) пĕрремĕш вырăн йышăннă. Хуçалăх уйĕсем таса, калчисем парка, çумкурăкĕ те çукпа пĕрех. Иккĕмĕш вырăнта – «Вăрнарти аш-какай комбиначĕ» АО (ертÿçи Николай Аливанов). Предприяти ÿсентăран отрасльне аталантарассипе çултан- çул курăмлă ĕçлет. Виççĕмĕш вырăна «Санары» агрофирма (ертÿçи Андрей Петров) тивĕçнĕ. Хуçалăхра вăрлăх ĕрчетессине пысăк тимлĕх уйăраççĕ.

Елена ПОРФИРЬЕВА.