Пĕр кунта пилĕк хваттерте тустарма ĕлкĕрнĕ пĕр «пултаруллă» вăрă. Тăр кăнтăр кунĕнчех çапла пуçтахланнă вăл. Сăмах пĕлтĕр октябрĕн 20-мĕшĕнче Вăрнарта пулнă киревсĕр ĕçсем пирки пырать. Темиçе çыннăн пурлăхне çаратаканĕ – ниçта ĕçлемен, пĕрмаях пурăнмалли вырăн çук 61-ри В.Иванов.

Ку преступление тăвиччен уйăх маларах, сентябрьте кăна, колони-поселенирен тухнă хăй. Вăрнар районĕн 1-мĕш суд участокĕн миравай судйин йышăнăвĕпе ăна пĕлтĕр икĕ хутчен те айăпланă. Пĕрремĕшĕнче – обязательнăй майпа 280 сехет ĕçлеттермелле, иккĕмĕшĕнче – 35 кунлăха ирĕкрен хăтарса.

Анчах, куратпăр, арçыннăн юсанас шухăшĕ пачах пулман. Октябрĕн 20-мĕшĕнче вăл ют пурлăха вăрлас шухăшпах К.Маркс урамĕнчи 53-мĕш çурта килнĕ. Ку икĕ хутлă çуртра харăсах пилĕк хваттере саккунсăр майпа кĕнĕ. Икĕ тĕслĕхĕнче хваттер алăкĕсене питĕрменни унăн вăрттăн «ĕçне» çăмăллатнă. Ытти хваттерсене арçын алăка кĕлеткипе çапса кăларса е çăрасене пуртăпа аркатса кĕме май тупнă.  Ăçта чукун плита, кăмакан чукун алăкĕсене, ăçта газ плитин конфоркисене тата ытти вак-тĕвек япаласене илсе тухнă. Юлашки хваттерте кăна ытларах «ăнăçнă» – кунтан вăл икĕ мăшăр кроссовки (6 пин тенкĕлĕх) тата 2 пин тенкĕ тăракан акустика системине йăкăртнă.

Ĕçлеме юратман арçын халĕ айăплава пĕтĕмĕшле режимлă колонире ирттерет. Вăрнар район сучĕ В.Иванова çулталăклăх юсанма яма йышăннă.

Дмитрий МИХАЙЛОВ,

полицин «Вурнарский» пайĕн аслă следователĕ.