Вăрнарсем ĕлĕкрен элĕксемпе туслă пурăннă. Халĕ те çаплах.

Кÿршĕсем пĕр-пĕрин ÿсĕм-çитĕнĕвĕшĕн савăнаççĕ. Пĕрлехи ĕçе пурнăçлаççĕ.

– Вăрнарсем хастарлăхпа палăраççĕ, ытлă-çитлĕ пурăнас тесе выльăх-чĕрлĕх йышлă усраççĕ, сĕт сутса çемье бюджетне ÿстереççĕ, – ырларĕ Любовь Семенова.

Калас пулать, Любовь Веняминовна мăшăрĕпе Венямин Панкратьевичпа Элĕкри «Иволга-Молоко» обществăра ĕçлеççĕ. Ирхи виççĕре ура çине тăрса хуçалăхри ĕçсене пуçтарнă хыççăн Вăрнар ене васкаççĕ. Калинино, Кÿлхĕрри, Хапăс ялĕсене çитсе халăхран сĕт пухаççĕ. Семеновсене пур çĕрте те ăшшăн йышăнаççĕ. «Иволга-Молоко» организаци пĕр литр сĕтшĕн 25 тенкĕ тÿлет. Продукци хакĕ выльăх-чĕрлĕх усракансене тивĕçтерет. Икĕ ĕне пуррисем уйăхне 20–21 пин тенкĕ таран ĕçлесе илеççĕ. Семеновсем чĕртавара 100 хушма хуçалăхран туянаççĕ.

– Любовь Веняминовнăпа Венямин Панкратьевич ĕçĕпе эпир питĕ кăмăллă, – çирĕплетрĕç хапăссем. – Сĕтшĕн укçа-тенкĕпе яланах вăхăтра татăлаççĕ. Халăхпа тарават, çав вăхăтрах çирĕплĕхĕ те пур.

Хапăсра пурăнакансем пирки Семеновсем хăйсем те ырă сăмахсем анчах каларĕç. «Продукци пахалăхĕшĕн тăрăшаççĕ, шыв хушмаççĕ», – хуравларĕç вĕсем. Калаçăва Сергей Гусев та хутшăнчĕ. «Яваплăха туятпăр, сĕт туянакансем пирĕнпе кăмăллă юлччăр тесе ĕçлетпĕр», – палăртрĕ вăл.

Пĕтĕмпе пухăннă 1700 тонна сĕте Семеновсем хăвăртах Элĕке çитереççĕ. Кунта продукцие сивĕтнĕ хыççăн сĕт завочĕсене леçеççĕ.

Елена ПОРФИРЬЕВА.