Пушар сÿнтерекенсемпе çăлавçăсем, шутласан, юрă-ташăран вуçех аякра пек. Анчах çак çирĕп, чăтăмлă маттурсем хушшинче те илемлĕ пултарулăхра чун киленĕçне тупакансем нумай. Юрă-ташă службăра та пулăшуçă, теççĕ вĕсем.

Çакна сăмахпа мар, хăйсен çитĕнĕвĕсемпе çирĕплетеççĕ. Ахальтен мар Вăрнарти 27-мĕш пушарпа çăлав чаçĕн команди МЧС-ăн республикăри Тĕп управленийĕ йĕркеленĕ смотр-конкурсăн кустри тапхăрĕнче çĕнтерÿçĕ ятне çĕнсе илнĕ. Вăл Çĕрпÿ хулинче май уйăхĕн 18-мĕшĕнче иртнĕ. Темиçе район коллективĕсем хушшинче ăсталăхĕпе вăрнарсене çитекенсем пулман. Çĕнтерÿре, чăннипе, сотрудниксен кăна мар, вĕсен çывăх çыннисен те тÿпи пысăк. Пултарулăх ушкăнне юрра-ташша маттур мăшăрĕсем, ачисем хавхаланса хутшăннă.

Кустри тупăшура мала тухнă вăрнарсем çапла майпа смотр-конкурсăн финал сцени çине тухма тивĕçнĕ. Кунсерен репетицисенче ăсталăха якатни сая кайман – Шупашкарти финалта та Вăрнарти пушарпа çăлав чаçĕн пултарулăх коллективĕ призлă вырăна йышăнма пултарнă. Мĕнпур номинацисен пĕтĕмĕшле кăтартăвĕсемпе вĕсем – республикăра виççĕмĕшсем.

Номинацисем вара тĕрлĕрен – хор юрри, фольклор номерĕ, Аслă Çĕнтерÿ кунне халалланисем, ача-пăча пултарулăхĕ тата ыттисем. Кашнинчех пирĕн «артистсен» номерĕсем çÿллĕ шайра пулнă. Жюри йышĕнче МЧС-ăн республикăри управленийĕн представителĕсемпе пĕрлех конкурсантсене РФ Культура тава тивĕçлĕ ĕçченĕ Ю.Кудаков композитор та хакланă. Вăрнарсем вĕсене номерсен хăйнеевĕрлĕхĕпе, костюмсен илемĕпе, таланчĕсен пуянлăхĕпе тĕлĕнтернĕ. Çĕнтерÿçĕсене, вăл шутра – Вăрнарти 27-мĕш чаç командине те – управлени пуçлăхĕн заместителĕ Юрий Антонов саламланă, дипломсемпе тата парнесемпе хавхалантарнă. Номинацисенче мала тухнисене те уйрăммăн чысланă.

Ирина ЯКОВЛЕВА.