Ларса ĕçлени, уçăлса çÿременни, хул-çурăма авса ĕçлеменни мĕнпур органа япăх витĕм кÿрет. Организмра шĕвек ытларах тытăнса тăрать, юн улшăнать. Сахал утакан-хускалакан, çан-çурăмне авман çыннăн юн майĕпен çÿрет, пÿре юна тĕппипех тасатаймасть. Юн майĕпен сиенлĕ веществосемпе тулса пырать, ку вара пÿрене пысăк йывăрлăхпа ĕçлеттерет. Юлашкинчен организм наркăмăшланса çитме, пÿре вăхăтсăр йĕркерен тухма пултарать. Сахал хускалакан çынсем тула кăларакан тытăмăн шыçă чирĕсемпе тата пÿрере чул пухăннипе аптăраççĕ. Тăтăшах уçăлса çÿрени вара пÿре чирĕсен хăрушлăхĕнчен хăтарать.