Канмалли кунсенче те ял хуçалăх предприятийĕсенче ĕç шавĕ тăрать. Хальхи вăхăтра районта тырă аллассипе 13 звено ĕçлет.

– Паха вăрлăх – лайăх тухăç никĕсĕ. Кăçал çураки ирттерме тĕштырăсемпе пăрçа йышши культурăсен вăрлăхне 3009 тонна хывнă, планпа кирлинчен 8 процент ытларах. Çак вăхăт тĕлне тĕрĕсленĕ вăрлăхăн 72 проценчĕ (2133 тонна) кондициллĕ, – пĕлтерчĕ Раççей ял хуçалăх центрĕн районти уйрăмĕн пуçлăхĕ Вячеслав Алексеев. – Республикипе илсен, вăрлăхăн 64 проценчĕ ака стандартне тивĕçтерет.

Районĕпе илсен, урпа 2042 тонна, çурхи тулă – 569, сĕлĕ – 213, вика – 80, пăрçа – 60, хуратул 8 тонна тĕрĕсленĕ. Тĕштырăсемпе пăрçа йышши культурăсен шăтаслăхĕ лайăх.

Аграрисем минераллă удобренисем кÿрсе килессипе те ĕçлеççĕ. Район администрацийĕн ял хуçалăхĕпе экологи пайĕн кăтартăвĕсем тăрăх çакă паллă% ял хуçалăх таварне туса илекенсем хальлĕхе 2120 тонна минудобрени туяннă. Иртнĕ çулхи çак вăхăтра 1700 тонна пулнă.

Елена ПОРФИРЬЕВА.