Вăрнарти «Рассвет» физкультурăпа спорт комплексĕнче «Чĕнÿ кубокĕ» волейбол турнирĕ хĕрÿ иртнĕ.

Унта Вăрнар районĕн тата Вăрнар поселокĕн командисем хушшинче тупăшу пынă.

Хĕрсем хушшинче Вăрнарти 1-мĕшпе 2-мĕш шкулсен пĕрлештернĕ команди Çĕрпелпе Кÿстÿмĕр шкулĕсен хутăш командине 3:2 шутпа çĕнтерсе мала тухнă.

Каччăсем хушшинче вара Çĕрпелпе Кÿстÿмĕр шкулĕсенче вĕренекенсем вăрнарсенчен вăйлăрах пулнă. Тĕлпулу шучĕ – 3:0.

Çамрăксем хушшинче хĕрсенчен мала поселок команди, арçынсенчен район команди тухнă.

Ветерансенчен те поселокра пурăнакансем çивĕчрех пулнă, районăн пĕрлештернĕ командине вĕсем 3:1 шутпа парăнтарнă.

Пĕтĕмĕшле кăтартупа Кубока Вăрнар поселокĕн пĕрлештернĕ команди тивĕçнĕ.