Правительство çуртĕнче Чăваш автономи облаçĕн 100 çулхи юбилейне хатĕрленсе ирттерессин концепцийĕн презентацийĕ пулнă.
Уяв «Пĕрле» слоганпа иртĕ. Ун тĕлне, пĕлтернĕччĕ ĕнтĕ, юбилей медалĕсем кăлараççĕ. Вĕсемпе вăрçă ветеранĕсене, республикăн хисеплĕ ĕçченĕсене, профессире чи лайăххисене, çавăн пекех конкурс-фестивальсен çĕнтерÿçисене чыслĕç. Чăваш ен историйĕпе йăласем пирки кĕнеке кăларма хатĕрлеççĕ.
Мероприятисен планĕ пуян. Вĕсене çитес ытларикун, мартăн 10-мĕшĕнче, «Чебоксары-Арена» Пăр керменĕнче официаллă старт парĕç. Çак кун пĕрремĕш хут районсемпе хуласен парачĕ пулать. Унта Вăрнар районĕн мухтавлă ĕçченĕсем те хутшăнĕç.
