Чăн-чăн çулла, шăрăх. Уçăлăх шыраса çынсем шыв-шур хĕрринелле туртăнаççĕ, çав шутра – ачасемпе çамрăксем те. Çавăнпа та МЧС çине-çинех асăрхаттарать: пĕве-кÿлĕ, юханшыв – пысăк хăрушлăх вырăнĕ.

Шыва кĕмелли тапхăр пуçланнăранпа республикăра пилĕк çын пурнăçĕ вăхăтсăр татăлнă, инкеке лекнисенчен пĕри – ача.

– Уйăх пуçламăшĕнче, ак, Шупашкарта çăлавçăсем Кукшум пĕвинчен 30-ти арçыннăн виллине кăларнă. Тепĕр икĕ кунтан Вăрнарта сарăмсăр инкек çырăннă: ятарласа хатĕрлемен вырăнта 50-ри арçын, ÿсĕрскер, шывран тухайман. Элĕкре вара 60-ти арçын, Шупашкарти пĕр пляжра 14-ри çамрăк путса вилнĕ. Арçын ача хăйĕн тантăшĕсемпе пĕрле аслисемсĕрех ишнĕ пулнă, – пĕлтерет Раççей МЧС-ĕн республикăри Тĕп управленийĕ.

Куратпăр, асăрханулăх çинчен мансан шыв чăнахах та çав тери хăрушă пулма пултарать. Кану савăнăç кăна кÿтĕр, япăххи аякран ирттĕр тесен çăлавçăсем сĕнекен правилăсене пăхăнмаллах:

Ятарлă, шанчăклă вырăнсенче кăна шыва кĕрĕр. Пĕлмен çĕрте авăрсем, тарăн шăтăк-путăксем, çыхлантаракан курăк, сивĕ çăлкуçсем, вăйлă юхăм е ытти пулма пултарать.

Эрех ĕçсен шыв çывăхне пыма юрамасть – ÿсĕрсем уйрăм хăрушлăхра.

Ишме пĕлместĕр-тĕк, вĕрсе хăпартнă матрацсемпе, хăмасемпе ан усă курăр. Тĕрĕссипе, ишме пĕлменнисен шыва пилĕк таран кăна кĕмелле.

Шывра чăмса, пĕр-пĕрне путарса ан ашкăнăр. Ачасене те иртĕхессинчен асăрхаттарăр.

Каçхине е çĕрле пĕччен шыва кĕмелле мар – тĕттĕмре çыранран аякка ишсе кайма пултаратăр. Хăраса ÿкни вара – инкексен тепĕр сăлтавĕ.

Çак чи ансат правилăсене уяни те инкеке асăрхаттарма пулăшать.

Ирина ЯКОВЛЕВА.