Республика Пуçлăхĕ Олег Николаев Раççей Президенчĕн Владимир Путинăн йышăнăвне – октябрĕн 30-мĕшĕнчен тытăнса ноябрĕн 7-мĕшĕччен ĕçлĕ мар кунсем тесе палăртнине – «питĕ тĕрĕс, кирлĕ йышăну» тесе пĕлтернĕ.

Хушма кану кунĕсене ахаль кĕртмен – çĕршывра ковидпа чирлекенсем те, пурнăçран уйрăлакансем те тăрук ÿссе кайнă. Сывлăх сыхлавĕн тытăмĕ çине тиев тата та ÿснĕ. Раççейĕпе ковидран сипленекенсем валли 276,5 пин койка-вырăн уйăрнă. Вĕсенче выртакансенчен 66,1 процентне кислород сывлавĕпе çыхăнтарнă.

Чăваш ен Пуçлăхĕ Олег Николаев сотрудниксен 80 проценчĕ вакцинациленнĕ предприятисем малтанхи режимпах, анчах çынсене QR-кодсемпе кăна йышăнса ĕçлеме пултарнине палăртнă. Сăмах кинотеатрсем, общепит предприятийĕсем, культура учрежденийĕсем пирки пырать.

Чăваш енре коронавирус пандемийĕ пуçланнăранпа унпа 31883 çын чирлесе ирттернĕ. Ковид пуçарнипе 2575 çын вилнĕ.