Шкул ачисемшĕн çамрăк армеецсен вăййисене хутшăнни асра юлакан самант çеç мар, вăй-хала, ÿт-пĕве, ăс-хакăла çирĕплетме пулăшакан пулăм та.

Пирĕн районта «Орленокпа» «Зарница» çак эрнере иртнĕ. Вăл стройпа утассине, вăй-хал гимнастикине, автомата сÿтсе пуçтарассине, пневматикăллă винтовкăран перессине, марш-бросока, ишессине, турист полосине тухассине, чупассине, командирсен тата творчество конкурсĕсене пĕрлештернĕ.

Кăçал çар-спорт вăййисем уй-хир условийĕсенче мар, спорт пÿлĕмĕсемпе стадионсенче иртнĕ. Апла пулин те вĕсен çивĕчлĕхĕ чакман. Çĕнтереслĕх туйăмĕ кашниннех вăйлă пулнă.

Пĕтĕмĕшле кăтартусем вара çакăн пек: «Зарницăра» чи маттуррисем – Калининăри, Аçăмçырминчи тата Санарпуçĕнчи вăтам шкулсенче вĕренекенсем.

«Орленок» ушкăнра мала тухнисем – Вăрнарти 1-мĕш, Хапăсри тата Вăрнарти 2-мĕш шкулсен çамрăкĕсем.

Юнкун çамрăк патриотсене район администрацийĕн пуçлăхĕ Андрей Тихонов, ун заместителĕ – вĕрентÿпе çамрăксен политикин пайĕн пуçлăхĕ Денис Трофимов саламланă, çĕнтерÿçĕсене наградăсемпе чысланă.