Пурнăçа çĕнĕ улшăнусем кĕрсех пыраççĕ. Акă, хальхи вăхăтра коронавируспа чирленĕ хыççăн ятарлă сертификата тивĕçетĕн.

Ку анчах мар. Юн анализĕ хыççăн антителасем палăрсан та QR-код илме пулать. Çапла майпа сертификата «коронавирус» диагнозĕ çук пациентсем тата прививка тутарманнисем илееççĕ.

Чăваш ен правительствин вице-премьерĕ – сывлăх сыхлавĕн министрĕ Владимир Степанов çирĕплетнĕ тăрăх, анализа республикăри 16 медицина лабораторийĕнче тăваççĕ. Паллах ĕнтĕ, куншăн укçа тÿлемелле. Нухратне харпăр хăй кĕсйинчен кăларма тивет. Патшалăх укçа уйăрмасть.

– COVID-сертификатсăр пысăк суту-илÿ çурчĕсене кĕме çукчĕ. Çĕнĕлĕхсене пула лару-тăру улшăнчĕ, – пĕлтерчĕ Вăрнар хĕрĕ Анна, Шупашкарта тĕпленнĕскер. – Анализ панă хыççăн манăн антителасем пурри çирĕпленчĕ. Даннăйсем Патшалăх тивĕçтерĕвĕсен пĕрлехи порталне тепĕр куннех килчĕç. «Сертификат йĕркеле» функци пулăшнипе хăвăртах QR-кодлă документа илтĕм.

Сертификата пĕр хутчен кăна параççĕ, ăна малалла тăсмаççĕ. Вăл 6 уйăхран хăйĕн вăйне çухатать.

Елена ПОРФИРЬЕВА.