Шел, Тăван çĕршыва çапăçу хирĕнче хÿтĕлесе пирĕн чи хăюллă та маттур ентешсем пуçĕсене хураççĕ. Хăйсене хĕрхенмесĕр, чĕрисем юлашки хут тапичченех парăнмасăр кĕрешеççĕ вĕсем тăван çĕр ирĕклĕхĕшĕн тата кунта пурăнакансен тăнăç пурнăçĕшĕн.

Мускав облаçĕнчи Электросталь хулинче çуралса ÿснĕ Максим Пугачев ?Тычкин% та пирĕн пуçсем çийĕн мирлĕ тÿпе пултăр тесе пурнăçне панă. Десантпа штурм батальонĕн çыхăну взвочĕн управленийĕн çар машинин командирĕ пулнăскер, ятарлă çар операцийĕнче çар тивĕçне чыслăн пурнăçласа пуçне хунă. Паттăр салтака Хăюлăх орденĕпе наградăлама йышăннă.

Максим ачаранах хастар та яваплă пулнине палăртаççĕ ăна пĕлекенсем. Шкул çулĕсенченех спортра çитĕнÿсем тунă: йĕлтĕрпе чупассипе, ишессипе, трамплинран сикессипе. Цирк студине акробатика енĕпе те занятисене çÿренĕ вăл, аслă классенче вара самбо тата дзюдо енĕпе ăсталăха туптанă.

Спортпа туслă, тĕреклĕ çамрăк çар службине сывлăш-десант çарĕсенче пурнăçланă, алла-аллăн тытăçас вĕренÿ енĕпе инструктор та шутланнă. Хăй вăхăтĕнче Мускав ОМОН-ĕн йышĕпе Чечня Республикинче командировкăра пулнă. 2017, 2018 çулсенче икĕ хутчен Луганск тата Донецк облаçĕсенче халăх ополченийĕн тытăмне хутшăннă...

Тăван çĕршыв хÿтĕлевĕнче кăтартнă паттăрлăх манăçмасть. Максим Пугачев çарта палăрнине çирĕплетекен Хăюлăх орденне Чăваш ен çар комиссарĕ Бахтиăр Холиков ĕмĕрлĕх управа унăн мăшăрне Татьяна Анатольевнана пачĕ. Торжествăлла мероприяти кĕçнерникун ЗАГС пайĕн залĕнче иртрĕ. Максим Владимирович чăнах та çирĕп те хастар, кăткăс самантра тĕрĕс те кирлĕ йышăнусем тăвакан çар çынни пулнине каларĕ вăл. Республика çыннисем унпа мухтаннине, çамрăксене унăн патриотлăх тĕслĕхĕпе воспитани памаллине уйрăммăн палăртрĕ.

Вăрнар округĕн администрацийĕн пуçлăхĕ Андрей Тихонов та çемьене ăшă тав сăмахĕсемпе хавхалантарчĕ. Йывăр çухатăва пĕрле пайланине, кирек хăçан та пулăшма хатĕррине пĕлтерчĕ.

Ирина ЯКОВЛЕВА.

Хăюллă ывăлĕсемшĕн тав туса

Ятарлă çар операцине хутшăнакан каччăсен амăшĕсем чăннипех те мухтава тивĕç. Вĕсем чăн-чăн арçынсене, патриотсене, чĕрисенче хăюлăхпа паттăрлăх çунакан ывăлсене пăхса çитĕнтернĕ.

Уяв кунĕсенче вĕсем хисепре пулчĕç. Чăваш ен Пуçлăхĕ Олег Николаев вĕсен кашни ячĕпе салам открыткисем çырнă. Вĕсене округăн территори пайĕсен пуçлăхĕсемпе депутатсем салтак амăшĕсем тата арăмĕсем патне çитерчĕç.

Пăртас, Кĕçĕн Кипек, Хапăс тăрăхĕсенче ку ĕçе шкул ачисене те явăçтарнă. Вĕренекенсем çĕршыв хÿтлĕхне тăнă арçынсен çывăх çыннисем валли открыткăсем ÿкернĕ, концерт лартса панă.

Кĕçĕн Кипек, Çавалкас, Пăртас, Уйкас Кипек, Кульцав, Хирпуç, Ершепуç, Шĕнер Ишек, Упнер территори пайĕсен пуçлăхĕсем Сергей Волков, Ольга Углова, Николай Петров, Александр Петров, Маргарита Павлова, Алена Федорова, Эрколий Молчанов, Радим Убаков, Геннадий Арбузов СВО-на мобилизациленнисен, хăй ирĕкĕпе хутшăнакансен амăшĕсене, мăшăрĕсене тав тунă, вĕсен çывăх çыннисем хăвăртрах çĕнтерÿпе таврăнассине хăйсем те кĕтнине пĕлтернĕ, республикăра ĕçлекен пулăшу мерисем пирки аса илтернĕ. Валерий Шумилов, Сергей Анисимов, Александр Максимов, Вячеслав Алексеев, Рифкат Киметов, Игорь Ехлаков округ депутачĕсем те салтак амăшĕсене ывăлĕсене тивĕçлĕ воспитани парса ÿстернĕшĕн хавхалантару сăмахĕсем каланă.

Чыславлă салампа ытти тăрăхра пурăнакан амăшĕсем патне те çитнĕ.

СВО-ран та салам сăмахĕсем вĕçсе çитрĕç. Вăрнар тăрăхĕн каччисем мĕнпур амăшне, йăмăкĕ-аппăшĕсене, асламăш-кукамăшсене, хĕрсене уяв ячĕпе саламларĕç. «Тавах сире пире хавхалантарнишĕн, пире ĕненнишĕн, кĕтнишĕн. Сирĕн яланах йăлтах йĕркеллĕ пултăр», - тенĕ вĕсем.

Светлана ЧИКМЯКОВА.