Республикăра «Эпĕ - хĕрарăм» конкурс пуçланни пирки пĕлтернĕччĕ. Кăçал вăл виççĕмĕш хут иртет. Ун номинацийĕсем ÿснĕ. Халĕ вĕсем вуннă. Çамрăксене, бизнес-ледисене, çавăн пекех кил хуçи хĕрарăмĕсене, нумай ачаллă амăшĕсемпе пенсионерсене уйрăм категорине уйăрнă.

Вăрнар округĕнчен конкурса пиллĕкĕн хутшăнаççĕ.

Антонина Яковлевна ФИЛИМОНОВА - муниципаллă округри пенсионерсен канашĕн председателĕ. Вăл «Моя семья - мое богатство» номинацире тупăшать.

Антонина Яковлевна 20 çул ытла тивĕçлĕ канура пулин те килте алă усса лармасть, обществăлла ĕçсенче хастар. Пенсионерсен канашне ертсе пынипе пĕрлех вăл Хĕрарăмсен канашĕн ĕçĕ-хĕлĕнче те хастар. Унсăр пуçне, Санарпуç ял старости пулнă май, тăван тăрăхăн чылай ыйтăвĕсене татас ĕçе те хастар хутшăнать.

Çавăн пекех вăл ăстаçă та. Вăрнарти музейри алăстисен кружокне хаваспах çÿрет. Çĕлеме, тĕрлеме, тутлă апат-çимĕç пĕçерме маçтăр. Сасси тата ун еплерех - шăпчăкăнни пек! Хăйĕн пултарулăхĕпе ветерансен хорĕпе пĕрле чылай концертра савăнтарать.

Хуçалăхĕ пысăк унăн. Пахчаçимĕç ăнса çитĕнтерет, выльăх-чĕрлĕх усрать. Ял пурнăçне юратать, çавăнпа та ял пурăнтăр тесе чылай тăрăшать.

Лиана Родионовна ГРИГОРЬЕВА - Ярмушка территори пайĕн тĕп специалист-эксперчĕ. «В интересах общества» номинацире тупăшать.

Лиана Родионовнан муниципаллă службăри стажĕ 23 çул. Ĕçĕ ун кăткăс та яваплă. Пурнăçпа тан утас тесен çĕннине вĕренсех пымалла. Вăл çапла тăвать те, хăйне аталантарассине яланах мала хурать. Çынсемпе пĕр чĕлхе тупма, вĕсен кăмăлне уçма, кашни çынпа ун ÿсĕмне кура калаçма пĕлет вăл.

Мăшăрĕпе виçĕ ача çуратса ÿстернĕ, тивĕçлĕ воспитани панă.

Пултаруллă çыннăн тем тума та вăхăт çитет. Акă, Лиана Родионовна алĕçĕпе тимлеме те, апат пĕçерме те, пахчаçимĕç ÿстерме те, выльăх-чĕрлĕхне пăхма та, Пуканкассинчи «Чашма» ушкăна çÿреме те ĕлкĕрет. Çавăн пекех унăн литературăри ăсталăхĕ те пысăк. «Çĕнтерÿ çулне» вулакансем ун сăввисене хапăлласах йышăнаççĕ. 2016 çулта Лиана Григорьеван «Таймапуç сире, атте-анне» кĕнеки кун çути курнăччĕ. Кăçал вăл Иван Ивник премийĕн лауреачĕ пулса тăчĕ.

Светлана Ивановна ИВАНОВА - Вăрнарти «Ручеек» ача сачĕн воспитателĕ. «К знаниям - без барьеров» номинацире тупăшать.

Светлана Ивановнан педагогикăри стажĕ 27 çул. 20-шĕ Вăрнарти ача-пăча пултарулăх çуртĕнче иртнĕ. Кунта вăл шкул ачисене алăсталăх вăрттăнлăхĕсене хывма вĕрентнĕ.

Халĕ çичĕ çул ытла ĕнтĕ кĕçĕннисенче пуçламăш пĕлÿ никĕсне хывать. Ачасемпе ĕçлеме ăна чăннипех те талантне чылай панă. Мĕн тĕрлĕ ĕç кăна ирттермест пулĕ вăл хăйĕн ушкăнне çÿрекен шăпăрлансемпе! Кашнин кăмăлне вĕсем çине пăхсах пĕлет.

Светлана Ивановна кăтартуллă ĕçĕшĕн Чăваш ен Пуçлăхĕн грантне тивĕçнĕ. Çавăн пекех вăл виçĕмçул районти «Чи лайăх воспитатель» конкурсăн çĕнтерÿçи пулса тăнăччĕ. Педагогикăри иксĕлми ĕçĕшĕн ытти сумлă наградăсене те тивĕçнĕ.

Марина Георгиевна ИВАНОВА - Аçăмçырминчи вăтам шкулти математика учителĕ. Вăл та «К знаниям - без барьеров» номинацире тупăшать.

Марина Георгиевна хăй вĕренсе пĕтернĕ шкулта 17 çул математикăна вĕрентет. Хăйĕн ĕçне чăннипех те юратать, çавăнпах ĕнтĕ кашни урок ачасемшĕн кăсăклă, тыткăçуллă пултăр, вĕренекенсем предмета юратчăр тесе тăрăшать.

Ку вĕренÿ çулĕнчен Марина Георгиевнан ĕçĕ те хушăннă. Вăл «Ÿсĕм точки» центрта информатикăна вĕрентме пуçланă.

«Мана юнашар опытлă ĕçтешсем пурри, вĕсем вĕрентсе пыни пулăшса пырать»,- тет вăл.

Паллах, çемье тĕревĕ те пĕлтерĕшлĕ. Мăшăрĕпе вĕсем икĕ ывăлпа пĕр хĕр çитĕнтереççĕ. Пĕтĕм ĕçе пĕрле тума тăрăшаççĕ. Час-часах пĕрле çулçÿревсене тухса çÿреççĕ. Пĕрле тĕрлĕ конкурссене хутшăнаççĕ.

Ольга Елизаровна ИВАНОВА - Пăртас библиотекин библиотекарĕ. «Мы созданы, чтобы творить» номинацире тупăшать.

Ольга Елизаровна - вăхăта чунпа туякан ĕçчен. Вăл самана таппинчен юлмасть. Çĕнĕ технологисемпе туслă. Ахальтен мар ĕнтĕ унăн пĕр вăхăтрах фотограф та, видеооператор та, монтажер та пулма тивет. Фото ÿкерме питĕ кăмăллать.

Вăл краеведени ĕçне аталантарассине тĕпе хурать. Пăртас ял историне сахал мар тĕпченĕ, ку енĕпе презентацисем те хатĕрленĕ. Виртуаллă куравсем, литература каçĕсем, конкурссем, вулавсем йĕркелет. Ольга Елизаровна тăрăшнипе Пăртас библиотеки тĕрлĕ шайри конкурссене хутшăнса малти вырăнсене çĕнсе илнĕ.

Вăл чăн-чăн профессионал. Ялта культура вучахĕ ан сÿнтĕр тесе ырми-канми тăрăшать. Ахальтен мар ĕнтĕ ун ĕçне тĕрлĕ шайри наградăсемпе палăртнă.

Унăн тепĕр юратнă ĕç те пур - вăл шăккалатран парнесем, открыткăсем тăвать.

Маттур хĕрарăм çемье телейне те малти вырăна хурать. Мăшăрĕ, ачисем, çывăх çыннисем юнашар пулнишĕн, хавхалантарса пынишĕн савăнать.

Сасăлав июнĕн 1-15-мĕшĕсенче «Народный контроль Чувашской Республики» сайтра иртет. Çавăнпа та васкăр - хамăр ентешсемшĕн сассăрсене ан хĕрхенĕр! Конкурса июнĕн 16-19-мĕшĕсенче пĕтĕмлетеççĕ. Çĕнтерÿçĕсене Республика кунĕнче чыслаççĕ.

Икĕ çул хушшинче конкурса пине яхăн хĕрарăм хутшăннă. «Халăх тĕрĕслевĕ» портал урлă сасăлав валли 766 видеоролик вырнаçтарнă.

Светлана ЧИКМЯКОВА