Çак сăмахсене районти культура çуртĕнчи волонтерсен ушкăнĕ чĕререн калать

Вĕсен пархатарлă, кулленхи пулăшуллă ĕçĕпе вулакансене паллаштарнăччĕ. Анчах та вĕсем пурнăçлакан калăпăш пирки хаçат тусĕсене татах та пĕлтерес килет. Кашни кун Çĕнтерÿшĕн чунтан тăрăшаççĕ вĕт!

Пĕтĕмĕшле РДК-ри волонтер пункчĕн хастарĕсем ятарлă çар операцийĕ валли 120 ытла маскировка сетки хатĕрленĕ. Малтанах çын сахалраххăн çÿренĕ пулин те маттур хĕрарăмсем станок çинчен сетка хыççăн сетка антарма пултарнă. Халĕ вара йыш самаях хушăннă - кунсерен 20-25 çын салтаксем валли хÿтĕлев хатĕрĕсем ăсталать.

Ушкăн пысăкланнине кура маттурсем маскировка сеткисем çыхассипе кăна çырлахас темен. Вĕсем пурнăç браслечĕсем те яваççĕ. «Вĕсем питех кирлине салтаксем çирĕплетсе пачĕç. Браслет кирлĕ чухне çăмăллăнах саланать, çирĕп çип вара тĕрлĕ тĕллевсене пурнăçлама пулăшать»,- терĕ Татьяна Павлова.

Волонтерсен пĕр пайĕ вара труççисем çĕлет. Ку ĕçе малтанах Çĕньял Хапăсри 77-ри Анна Платонова пуçарса янă. Чĕри чăннипех те Çĕнтерÿшĕн тапни çакăнтан та аван курăнать - Анна Николаевна 2023 çулхи июльтен тытăнса кашни кун ялтан РДК-на сетка çыхма çÿренĕ. Пĕлтĕрхи ноябрьтен тытăнса вара труççисем çĕлеме пуçăннă. «Пĕрре телефон пăхса ларатăп та пĕр хĕрарăм СВО валли арçынсен аялти тумне çĕленине куртăм. Эпĕ те пултаратăп-çке терĕм!»- кăмăллăн пĕлтерет вăл.

Çакăнтан тытăнса килти усă курман пусмасем йăлтах ĕçе кĕнĕ. Вĕсем пĕтсен Чулхулара пурăнакан хĕрĕ патне шăнкăравланă: «Тен, паллакансен килĕнче çитсă тавраш ахалех выртать, ыйтса пăх, тархасшăн, терĕм». Чăнах та, материал пухса паракансем пулчĕç.

Анна Николаевна ыйтнипе тăван ялĕнче пурăнакансем те пусма татăкĕсене килсе параççĕ. Эрнере 30-40 таран çĕлет ăстаçă труççисене, эрнере пĕрре РДК-на çитерсе парать. Пĕтĕмпе вара вĕсене 250 штук хатĕрленĕ. «Пĕртак та пулин усă кÿрес килет. Çăмăл мар пирĕн ачасене фронтра, вĕсемшĕн чун ыратать. Вăрçă хăвăртрах пĕттĕрччĕ, пурте киле сывă таврăнччăр. Турă çăлса пытăр вĕсене»,- терĕ Анна Платонова.

Ун тĕслĕхĕпе ытти хастарсем те хĕмленнĕ. «40 çула яхăн Вăрнарти 29-мĕш училищĕре ĕçленĕ май, кашни ачана хам ача пек туйнă. СВО-на хутшăнакансене те çавăн пекех йышăнатăп. Кашни труççине кăмăлтан çĕлетĕп, сывă, ал-ураллă килччĕр тесе кашни ир Турăран тилмĕретĕп»,- калаçăва хутшăнчĕ ырă ĕçе хутшăннă Зоя Ильинична Кузнецова. Вăл труççисене 50 ытла çĕленĕ ĕнтĕ. «Ырă кăмăл ырăпа таврăнать, тенĕ ваттисем. Пирĕнтен çакăн пек пулăшу пултăр»,- тет вăл.

Надежда Дмитриевна Степанова та иккĕмĕш çул сеткăсем çыхма çÿрет. Çавăн пекех вăл та труççисем çĕлет. Ун шухăшĕ те çар операцийĕнчи салтаксемпе пĕрле. Ирпе виççĕре вăранать-и е ыйхи килмест - тÿрех çĕвĕ машини умне ларать. Вăл пурнăçланă ĕç 150 штука çитнĕ.

Светлана Давыдова та вĕсенчен юласшăн мар. Ун алли 60-а яхăн труççи маçтăрланă. Маттур хĕрарăм тепĕр мел те шутласа тупнă, труççисене вăл резинкăпа мар, липучкăсемпе çĕлет. Çакă уйрăмах аманнă салтаксене тăхăнма меллĕ, тет вăл.

Пултаруллă çĕвĕçсене пĕр ыйту кăна канăçсăрлантарать - материал çитменни. Хальлĕхе вĕсене пĕлĕшĕсем, ентешĕсем пулăшнă. Ырă чунлисене те ятранах асăнса хăварас килет. Ирина Федорова, Ирина Семенова, Елена Осипова, Валентина Петрова, Анна Волкова, Зоя Степанова, Вера Миронова, Раиса Капралова, Нина Афанасьева, Светлана Шакртова, Раиса Гордеева, Елена Радаева, Алевтина Никандрова, Надежда Макарова, Галина Максимова, Тамара Максимова, Елена Павлова, Татя Гордеева, Марина Михайлова, Вера Тумаланова, ветерансен халăх хорне çÿрекенсем.

Хастарсене ыттисем те пулăшма пултараççĕ. Килти арчасенче усă курман материалсем чылайăшĕн пурах ĕнтĕ. Вĕсене РДК-на, пасарти «У Оксаны» лавккана е «Çĕнтерÿ çулĕн» редакцине килсе парсан аван. Тен, кам та пулин пир-авăра лавккаран та туянса пама кăмăл тăвĕ. Çĕнтерÿшĕн кашни метрĕ пĕлтерĕшлĕ...

Светлана ЧИКМЯКОВА