Ял хуçалăх министерстви çемье фермисене тата агросекторти стартапсене пулăшмалли грант виçине ÿстерме сĕннĕ. Хальлĕхе пуçарăва тишкереççĕ-ха.

Çемье фермине «Сĕтшĕн тата аш-какайшăн усракан мăйракаллă шултра выльăх» енĕпе аталанмалли гранта 15-рен 18 миллион тенкĕ таран ÿстерме сĕннĕ. Выльăх ĕрчетес тата пахчаçимĕç туса илес енĕпе ĕçлекенсем валли - 7-рен 9 миллион тенкĕ таран. «Агростартап» грантăн чи пысăк виçине 5 миллион тенкĕ таран хăпартасшăн. Çак виçери 4 миллион тенке - федераци, тепĕр миллионне вара республика бюджечĕсенчен саплаштарасшăн.

Чăваш Республикин ял хуçалăх министрĕ Сергей Артамонов палăртнă тăрăх, грант пулăшăвĕпе çыхăннă улшăнусем хăйсен ĕçне аталантарас тĕллевлĕ çĕнĕ майсем уçать. Ял-сала экономикине çирĕплетсен унта пурăнакансен пурнăç шайĕ те ÿсет.