Иртнĕ эрнере районти клуб учрежденийĕсенче тимлекенсем умлăн-хыçлăн икĕ професси уявне – Культура ĕçченĕсен кунне тата Пĕтĕм тĕнчери театр кунне – паллă турĕç.

Çынсене савăнăç, кăмăл çĕкленĕвĕ парнелекенсене эрнекун район администрацийĕн пуçлăхĕ Леонид Николаев саламланă. Професси ĕçне аталантарассине пысăк тÿпе хывакансем тĕрлĕ шайри наградăна тивĕçнĕ.

Чăваш Республикин Культура, национальноçсен ĕçĕсен тата архив ĕçĕн Хисеп грамотипе районти ача-пăча литературин уйрăмĕн тĕп методистне Юлия Курбатована чысланă. Чăваш ен Патшалăх Канашĕн Хисеп грамотине пиллĕкĕн илнĕ% районти культура çурчĕн хормейстерĕ Алина Евдокимова, тĕп методисчĕсем Марина Григорьева тата Людмила Иванова, районти тĕп библиотека ĕçченĕ Нелли Лукина тата Çĕрпелти библиотека ĕçченĕ Ирина Степанова. Çавăн пекех культурăра тăрăшакансене район администрацийĕн тата централизациленĕ клуб системин Хисеп хучĕсемпе наградăланă.

Ку тытăмра тимлекенсен ĕçĕ курăмлă. Пĕлтĕр кăна вĕсем сакăр пин ытла мероприяти ирттернĕ. Çулсерен тĕрлĕ шайри фестиваль-конкурссене хутшăнаççĕ, вĕсенче палăраççĕ. Нумаях пулмасть, акă, районти культура çурчĕн методисчĕ Алина Федотова професси ăсталăхĕн «Культурăн чи лайăх çамрăк ĕçченĕ» республика конкурсне хутшăннă, 2-мĕш вырăн йышăннă.