Иртнĕ эрнере районти пĕр çамрăк кĕтмен çĕртен хăйĕн «хурçă учĕсĕр» тăрса юлнă. Унăн машинипе хуçинчен ыйтмасăр «ярăнакансене» вара районти йĕрке хуралçисен шырама тивнĕ.

«Полицин «Вурнарский» пайне пулăшу ыйтма килсен 22-ри çамрăк çакнашкал пăтăрмаха мĕнле лекнине тĕплĕн каласа панă. Калининăран яла таврăнаканскер çула май машинăна палламан икĕ çамрăка лартнă-мĕн. Тин паллашнă пĕлĕшĕсемпе кил умĕнче эрех те ĕçнĕ. Тахăш вăхăтра вăл, нумайлăха та мар, аяккалла кайса килнĕ. Каялла таврăнать те – çĕнĕ «тусĕсем» те, машини те çук.

Полицейскисем тÿрех шырав ĕçĕсем пуçланă. Машинăна тĕп хулари ГИБДД сотрудникĕсем Шупашкар районĕнче тупса чарма пултарнă. Транспорта ку районта пурăнакан 18-ти тата 19-ти икĕ çамрăк хăваласа тарнă тесе шутлаççĕ. Киревсĕр ĕçпе вĕсем пĕрремĕш хут мар лекеççĕ – вăрланăшăн тата вăрă-хурахла çаратнăшăн унччен те судпа айăпланнăскерсем.

Ку тĕслĕхпе уголовлă ĕç пуçарнă», – пĕлтерет Шалти ĕçсен республикăри министерствин пресс-служби.

Ирина ЯКОВЛЕВА.