Республикăра «Экологи» наци проекчĕ йĕркипе çÿп-çап реформи анлăн пурнăçланать, вăл шутра – Вăрнар районĕнче те.

Хальхи вăхăтра районта çÿп-çап пухмалли 269 площадка йĕркеленĕ. Вĕсенче 506 контейнер вырнаçтарĕç.

Юнкун евроконтейнерсен тепĕр партине кÿрсе килнĕ. Пĕтĕмпе 156. Вĕсене ял поселенийĕсене ăсатĕç.

Çÿп-çап çаврăнăшĕн çĕнĕ йĕркипе килĕшÿллĕн пĕлтĕр кунашкал контейнерсене Вăрнар хула поселенийĕнче кăна вырнаçтарнăччĕ. Кăçал ялсем валли евроконтейнерсен пĕр партине августра кÿрсе килнĕччĕ.

Иртнĕ уйăхра тивĕçтернĕ контейнерсем симĕс тĕслĕччĕ, халĕ – кăвак. Çакă малашлăхра çÿп-çапа уйăрса пуçтарассине йĕркелеме май парĕ.

Пĕтĕмпе евроконтейнерсем туянма республика бюджетĕнче 87 миллион тенкĕ пăхнă. Вăл шутран Вăрнар районне 3 миллион та 940 пин ытларах тенки тивĕçет.

Ял поселенийĕсенче пĕтĕмпе 277 контейнер площадки йĕркелемелле.

Светлана ЧИКМЯКОВА.