Хевтесĕр çамрăксем хушшинчи професси ăсталăхĕн «Абилимпикс – 2019» чемпионачĕ йĕркипе республикăра пĕрремĕш хут «Абилимпиксăн чи лайăх волонтерĕ» конкурс та иртнĕ.

Хăйсен пултарулăхне кăтартса, республикăри чи хастар волонтерсен йышĕнчи тăхăр çамрăк тупăшнă конкурсра. Вĕсем тĕрлĕ вĕренÿ заведенийĕсенчен: Шупашкарти Н.Никольский ячĕллĕ професси, экономикăпа технологи колледжĕсенчен, педагогика университетĕнчен, тĕп хулари транспорт строительство технологийĕсен тата Вăрнарти ял хуçалăх техникумĕсенчен. Кашниех гражданла активлă кăмăл-шухăшлă, вĕренÿре те, обществăлла ĕçсенче те маттур. Конкурсра вĕсем хăйсен ĕçĕ-хĕлĕпе туллин паллаштарнă.

Вăрнар техникумĕн чысне ăмăртура Борис Ильдуганов волонтер- студент тивĕçлĕ хÿтĕленĕ. Çамрăк пуян портфолио пухнă. Тăрăшса хатĕрленĕ презентацийĕ те волонтерăн проектне, ÿсĕмĕсене, мероприятисене хутшăнса пурнăçланă ĕç-хĕлне туллин уçса панă. Экспертсен ыйтăвĕсем те «такăнтарман» ăна: тĕрĕс те анлă хуравланă. Унăн обществăлла тата волонтерла ĕçĕ-хĕлĕ лайăх хака тивĕçнĕ.

Ирина ЯКОВЛЕВА.