Çак уйăхрах суд умĕнче Узбекистан çынни явап тытнă.

Вăл йĕрке хуралçисен аллине взятка пама хăтланнă чух çакланнă. Палăртнă тăрăх, сентябрьте полицин «Вурнарский» пайĕн ГИБДД сотрудникĕсем 23-ри çамрăк тытса пынă машинăна чарнă. Калинино салинче пулса иртнĕ ку пăтăрмахлă ĕç. Инспекторсем транспортри пассажир административлă йĕркене уяманнине палăртнă – вăл ют çĕршыв гражданинĕн Раççейре пулмалли йĕркене пăснă.

Пассажир тĕлĕшпе административлă ĕç ан пуçарччăр тесе водитель автоинспектора 1500 тенкĕ «хавхалану» сĕннĕ. Анчах лешĕ укçана илме килĕшмен.

Уголовлă ĕçе 2-мĕш суд участокĕн миравай судйи пăхса тухнă. Патшалăх айăплавçи ыйтнине шута илсе, взятка паракана 20 пин тенкĕ штраф хунă. Вăл арестра пулнине кура, саккунпа килĕшÿллĕн, штраф виçине пĕчĕклетнĕ: 8 пин тенкĕ хăварнă.

А.СОРОКИН,

Вăрнар район прокурорĕн помощникĕ.