Аçăмçырми шкулĕнчи çамрăк инспекторсем Раççей шайĕнче ку юхăмăн чăн-чăн маттурĕсем пулнине çирĕплетнĕ.

Профильлĕ смена Пĕтĕм Раççейри «Орленок» ача-пăча центрĕнче иртнĕ, Чăваш ен чысне хÿтĕленĕ «Сигнал» команда унта конкурсăн мĕнпур тапхăрне ăнăçлă тухса çĕнтерÿçĕ пулса тăнă.

Кăçал слета 47 регионти 51 команда пухăннă. Вăл шутра – Аçăмçырми шкулĕн хастарĕсем те: Регина Белова, Анна Константинова, Кирилл Кумруков, Валерий Николаев.

Виçĕ эрне хушшинче ачасем уйрăммăн та, командăпа та тупăшнă. Творчество конкурсĕнче вĕсем «Ачасене – хăрушсăр çулсем» темăпа эссе, авторла юрă, сăвă хайланă. Ăс-хакăл тупăшăвĕнче тестировани витĕр тухнă. Спорт конкурсĕн тапхăрĕнче «Орленок» нормативне пурнăçланă тата велосипедпа фигурăсем туса ярăннă. Кунта 1-мĕшпе 2-мĕш вырăнсене аçăмçырмисем – Валерий Николаев тата Кирилл Кумруков – çĕнсе илнĕ.

Ачасене ку енĕпе пултаруллă педагог – Владимир Георгиевич Петров – çирĕп пĕлÿ парать.

Светлана ЧИКМЯКОВА.