Пирĕн çĕршывра 190 ытла наци çынни пурăнать, вĕсем 280 яхăн чĕлхепе калаçаççĕ.

Кашнин хăйĕн культури, йăли-йĕрки, чĕлхи. Халăхсен туслăхĕ, пĕрлĕхĕ, килĕштерсе пурăнни Раççейĕн тĕп вăйĕ, пуянлăхĕ пулса тăраççĕ те.

Халăх пĕрлĕхĕн кунне 2005 çултанпа паллă тăватпăр. Вăл – çĕршыври чи çамрăк уявсенчен пĕри. Ăна Раççей историйĕнчи пĕлтерĕшлĕ пулăма – 1612 çулта Мускава поляк-интервентсенчен хăтарнине – тата Таса Турă Амăшĕн Хусанти турăшне аслăлассине халалланă. Федераллă саккунпа килĕшÿллĕн ноябрĕн 4-мĕшне Раççей çар мухтавĕн кунĕсен шутне кĕртнĕ.

Ноябрĕн 4-мĕшĕнче Шупашкарта çулсерен ку уяв ячĕпе чаплă концерт-митинг иртет. Кăçал та вăл нумай нациллĕ республикăна пĕрлештерĕ.

Вăрнар район çыннисем те мухтавлă уява ырласа йышăнаççĕ. Районти библиотекăсенче çак кун тĕлне тĕрлĕ мероприятисем йĕркелеççĕ.