Авруй ялĕнче пурăнакансене пĕрлехи пухăва пуçтарăнма çивĕч ыйту хистерĕ.

Вĕсем хăйсене тахçанах хумхантаракан нуша – яла çитмелли пилĕк çухрăма яхăн çул çав тери япăхса юрăхсăра тухни пирки калаçрĕç.

– Юлашки çулсенче пирĕн яла автомашинăпа мар, çуран утса çитме те питĕ кансĕр. Вăрман ĕçлекенсем ăна урлă та пирлĕ ишсе, тĕппипех аркатса пĕтерчĕç. Çула тĕксе хăпартнăранпа 40 çул çитрĕ, анчах ăна юсаса тăрасси пирки манчĕç курăнать. Инкек-синкек сиксе тухас пулсан пушар машини те, васкавлă пулăшу та пирĕн пата ниепле те çитеймĕç!.. – чĕререн кулянса калаçрĕ ял старости Сергей Антонов.

Çул пирки ыттисем те хĕрÿллĕн калаçрĕç. Вĕсен пăшăрханăвĕ чăнах та пысăк. Авруй çыннисем çак çула хытарса юсаса пама ыйтаççĕ, ку ĕç пурнăçланасса шанаççĕ.

Александр АНТОНОВ,

«Единая Россия» парти членĕ.