Чÿк уйăхĕн 16-мĕшĕнче чăвашсен çутăран та çутă çăлтăрĕ, хастар сăвăçисенчен пĕри, чăваш поэзийĕн классикĕ, революци йыхравçи, кăвар чĕреллĕ çĕн ĕмĕр чăвашĕ – Çеçпĕл Мишши (Михаил Кузьмич Кузьмин) – çуралнăранпа 120 çул çитнине халалласа Ярмушкари вăтам шкулта литература уявĕ иртрĕ.

Киеври А.П.Довженко ячĕллĕ киностуди ÿкернĕ «Çеçпĕл» фильмăн пĕр пĕчĕк пайне пăхни юратнă поэта чĕррĕн куç умне кăларма май пачĕ. Çеçпĕл Мишши рольне унта чăваш артисчĕ Иосиф Дмитриев вылять. Çеçпĕл Мишшине сума суса пирĕн сăвăçсем, композиторсем, ÿнерçĕсем сăвăсем, юрăсем, картинăсем чылай çырнă.

Карина Петрова Канаш районĕнчи Çеçпĕл музейĕнче пулса курнăран хăй хатĕрленĕ презентаципе кунти экспонатсем çинчен курăмлăн каласа пачĕ. Сăвăçăн амăшĕн, Агафия Николаевнăн, сăнарне Настя Лаврентьева, шăллĕне – Гурие – Вячеслав Кузьмин, Анастасия Червякована – Снежана Андреева калăпларĕç. Виктор Петров Çеçпĕл Мишшин «Чăваш сăмахĕ» хайлавĕпе, Стас Мефодьев чунне уçса паракан çырăвĕсемпе паллаштарчĕç. Анна Куракова, Александр Николаев, Эвелина Отрыванова, Кристина Алексеева, Люда Васильева, Иван Павлов, Кристина Павлова, Александра Абрамова поэтăн тĕрлĕ тапхăрта çырнă сăввисене чуна пырса тивмелле янăраттарчĕç.

В.ИЛЬИНА.