Ноябрĕн 16–22-мĕшĕсенче Мускавра сывлăх енчен хавшакраххисем хушшинче «Абилимпикс» V наци чемпионачĕ иртнĕ.

Чăваш ен команди йышне Калининăри шкул-интернатăн вĕренекенĕсем те кĕнĕ. Николай Иванов «Йывăçран касса кăларасси», Владимир Арсентьев «Пушмак юсасси» номинацисенче тупăшнă. Вĕсем – професси ăсталăхĕн регионти чемпионачĕн çĕнтерÿçисем.

Палăртма кăмăллă, Николай Иванов суйлавлă тура ăнăçлă тухса финалистсен йышне лекнĕ. «Шкул ачисем» категорире пĕтĕмпе 24-ăн ăмăртнă.

Финалти кăтарту та çав тери чаплă: Николай пысăк ăсталăх кăтартса 3-мĕш вырăн йышăннă! Ертÿçи – Александр Георгиевич Смирнов. Саламлатпăр!

Светлана ЧИКМЯКОВА.