Аслă Çĕнтерÿ кунĕччен вăхăт нумай юлмарĕ. Юбилейлă сумлă датăна хатĕрленсе районта та тĕрлĕ мероприятисем иртеççĕ.

Вăрнарти историпе краеведени музейĕ Пĕтĕм Раççейри «Геройсене астуса» патриотизмла проекта хутшăннă.

Пĕрремĕш тапхăрпа çурхи каникул вăхăтĕнче ача-пăча пултарулăх çурчĕн воспитанникĕсемпе пĕрле районти Совет Союзĕн Геройĕсем тата Мухтав орденĕн тулли кавалерĕ пирки видеороликсем ÿкернĕ. Тепĕр тапхăрпа видеосене социаллă сетьсенче вырнаçтарнă. Проекта хатĕрлес ĕçре Вăрнарти 2-мĕш вăтам шкулти Галина Костянецкая (4-мĕш кл.), Никита Мирошниченко (9-мĕш кл.), Вăрнарти 1-мĕш шкулти Карина Федорова (7-мĕш кл.), Дмитрий Афанасьев (7-мĕш кл.), Валерий Павлов (8-мĕш кл.) хастар пулнă.

Юнкун вара районта «Георгий хăйăвĕ» патриотизмла акци старт илнĕ. Çĕнтерÿ символне район администрацийĕн ĕçченĕсем, район Пухăвĕн депутачĕсем кăкăрсем çине çакнă. Акци çулсеренех «Эп астăватăп! Эп мухтанатăп!» девизпа иртет.