Çанталăк çур енне кайнă май аграрисем хĕрÿ тапхăра тăрăшсах хатĕрленеççĕ. Техника юсаççĕ, удобрени, çунтармалли-сĕрмелли материалсем, акмалли вăрлăх янтăлассипе тимлеççĕ.

Карл Маркс ячĕллĕ кооперативăн йĕтем хуçалăхне пырса кĕнĕ-кĕменех ĕç шавĕ  илтĕнет.

 – Çуркуннехи кăмăл лайăх. Хĕвел кунран-кун ăшăрах пăхать. Хресчене уй-хир ĕçĕсене пуçăнма вăхăт çитсе пынине систерет.  Çуракине хатĕр. Акмалли ял хуçалăх культурисем çителĕклĕ, – хыпарларĕ кооператив ертÿçи Валерий Шумилов.

Карл Маркс ячĕллĕ кооператив – паха вăрлăх ĕрчетекен хуçалăх. Çак пархатарлă ĕçе нумай çул – колхоз юхăмĕ вăй илнĕ тапхăртанпах – пурнăçласа пырать.     Пĕлтĕр ял хуçалăх çулталăкĕ ăнăçлă пулнă. Çавалкассен элита вăрлăхне Раççейĕпех хаклаççĕ – Суздаль, Владимир, Ярославль, Мускав облаçĕсенчи ял хуçалăх предприятийĕсем хапăлласах туянаççĕ.  Çулсерен ял хуçалăх культурисене пĕр пин тоннăна яхăн вырнаçтараççĕ.  Хамăр района илес-тĕк, уйрăмах «Янгорчино» хуçалăх Карл Маркс ячĕллĕ кооперативпа тачă çыхăну тытать. Çавалкассен вăрлăхне çавăн пекех «Луч»,  «Мураты» кооперативсем тата пĕчĕкрех фермер хуçалăхĕсем кашни çулах туянаççĕ.

  – Паллах, ыттисен те хастартарах пулмалла. Хамăр тăрăхра туса илнĕ паха вăрлăха илмеллех, – çирĕплетрĕ Раççей ял хуçалăх центрĕн районти уйрăмĕн пуçлăхĕ Вячеслав Алексеев.

Ваттисем калашле, мĕн акатăн, çавă шăтать. Кооперативăн «Надежный» сортлă урпине  ыйтакансем чылай, анчах хальхи вăхăтра  «Ульяновец» пăрçа тата «Ульяновская–105» çурхи тулă кăна сутмалăх юлнă.  Паянхи  кун   ĕç çыннисем çак культурăсене аллассипе вăй хураççĕ.

– Шалу лайăх тÿлеççĕ. Мĕншĕн тăрăшас мар; – терĕç Наталия тата Владимир Павловсем. Вĕсем пĕр мăшăр. Яваплăха туйса ĕçлеççĕ. Пăрçана Киров облаçне яма хатĕрлеççĕ. Сарлака та капмар шур михĕсем (ăна биг-бег теççĕ) тулнă хыççăн Владимир Сергеевич вĕсене погрузчикпа тепĕр вырăна куçарса лартать. Кĕлет тулсах пырать.

Вячеслав Алексеев, кооператив ертÿçин çумĕ Галина Абрамова тата кĕлет заведующийĕ Надежда Афанасьева  пăрçан пахалăхне палăртма культурăна кирлĕ чухлĕ илчĕç. Раççей ял хуçалăх центрĕн районти уйрăмĕнче пăрçана шăтаслăх, тасалăх, нÿрĕклĕх, йывăрăш енĕпе тата культурăра сиенлĕ хурт-кăпшанкă, чир-чĕр пуррипе çуккине тĕрĕслĕç. Ятарлă документ илнĕ хыççăн Шупашкарти учрежденине каймалла.  Пахалăх сертификатне тивĕçсен Карл Маркс ячĕллĕ кооператив  вăрлăха шикленмесĕрех сутма пултарĕ.

  – Кондицие тивĕçменни пĕрре те пулман. Кооператив хăйĕн таса ятне пĕрре те çĕре ÿкермен, – çирĕплетрĕ Валерий Филиппович. Тĕп вырăнта – пахалăх.

Агротехникăна пăхăнса ĕçленĕрен, çĕнĕ вăрлăх ĕрчетнĕрен тĕш тырăпа пăрçа йышши культурăсем  çултан çул тухăçпа савăнтараççĕ. Вырса илнĕ хыççăн тÿрех алласа кĕлетсене вырнаçтараççĕ. Кирлĕ-тĕк тепĕр хут та тасатаççĕ. Хăшпĕр хуçалăхсем  Карл Маркс ячĕллĕ кооперативăн уй-хир продукцине кĕркуннех туянаççĕ.  Пулас тухăç пирки маларах шухăшлаççĕ.

Хуралтăсене кашни çулах çĕклеççĕ, çĕнетсе улăштараççĕ. Планра – тырă типĕтмелли механизациленĕ тепĕр комплекс  тăвасси.

 Коллектив пĕр тĕллевпе тăрăшать. Кадрсен ыйтăвĕ çук. Ĕç вăйĕ çителĕклĕ. Паллах, хуçалăх тилхепине тытса пыраканăн яллă тăрăхра çамрăксене те ытларах курас килет. Çуралса ÿснĕ енрен пахи нимĕн те çук. Çакна ăнланакансен йышĕ ÿссен малашлăхра та йăх-несĕлĕмĕрсен пархатарлă ĕçне тăсакансем – тырпул акса çитĕнтерекенсем – пулаççех.

Елена ПОРФИРЬЕВА.