Çитмĕл пилĕк çула çитнине сиссе те юлаймарăм, пĕрре те нумай пурăннă пек туйăнмарĕ. Сăн-питре пĕркеленчĕксем курăнаççĕ пулин те, чун тени чăннипех те ватăлмасть иккен.

Шел, çулсем хăйĕн ĕçнех тăваççĕ, халĕ çамрăк чухнехи пек çăмăллăн чупса-утса çÿреме вăй-хал чакса пырать, çавна туйса тăратăп.

Ку сăмахсем Çĕмĕрле районĕнчи Турханта вунпĕр ачаллă çемьере çуралнă, халĕ Вăрнарта пурăнакан Елена Григорьевна Матвеева çинчен пыраççĕ.

Елена артист пулмах çуралнă, мĕн ачаран юрра-ташша юратнă. Тĕрлĕ конкурса хутшăннă, ялан малти ретре пулнă. Амăшĕ те ăна пултарулăхне аталантарма хавхалантарсах пынă. «Юрла, хĕрĕм, Тамара Чумакова пек юрлама пултар», – тенĕ.

Хутарти шкула пĕтерсен Шупашкарти культурăпа çутĕç училищине вĕренме кĕрсе хор дирижерĕн специальноçне алла илнĕ. Хусанти учительсем хатĕрлекен институтра аслă пĕлÿ илсе хăйне килĕшекен специальноçпе ĕçе пикенет. Стажĕ 1967 çултан шутланать.

Культурăн йывăр лавне туртма çăмăл пулман. Тĕрлĕ вырăнсенче тимлеме тÿр килнĕ, анчах пĕтĕм ĕç тапхăрĕ Вăрнар районĕнче иртнĕ. Чылай – çул культура пайĕн инспекторĕ, культура çурчĕн методисчĕ. Ветерансен хорне нумай çул ăнăçлă ертсе пынă. Унăн ĕç стажĕ 50 çул енне.

– Сцена манăн пурнăç, манăн ĕмĕр, – тет Елена Григорьевна. Халĕ те унăн сасси малтанхи пекех янăравлă. Хор коллективĕнче хисепре, унăн ĕçĕ пурне те кăмăла каять. Халĕ ĕнтĕ тивĕçлĕ канура.

Ветерансен халăх хорĕн коллективĕ чăннипех те халăхра ырă ят çĕнсе илчĕ. Юррисене халăх ырăпа йышăнать, тăвăллăн алă çупса кĕтсе илет.

Ăçта кăна пулмарĕ-ши çак коллектив: Крымра Чăваш Акатуйĕнче, Тутарстан республикинчи Нурлат районĕнче, Смоленск хулинче, хамăрăн тĕп хулара темиçе хутчен те... Кашнинчех пысăк хисепе тивĕçсе таврăннă.

Пирĕн хисеплĕ те юратнă çыннăмăрăн – Елена Григорьевна Матвееван – июнĕн 4-мĕшĕнче çуралнă кунĕ – 75 çулхи юбилей. Çак паллă кун ячĕпе ăна чун-чĕререн тухакан чи ăшă та çепĕç сăмахсемпе саламлатпăр. Пурнăç çулĕпе малашне те ырлăхпа-сывлăха утма сунатпăр.  

Эпир яланах туйса тăракан чун ăшшипе кăмăл пуянлăхĕ, ăшпиллĕх, тараватлăхпа вашаватлăх ан иксĕлтĕр санра. Эпир сана чунтан юрататпăр, хисеплетпĕр. Эсĕ пурришĕн Турра тав тăватпăр.

Çак чунран тухакан ăшă сăмахсемпе – ветерансен хорĕн коллективĕн старостине пулăшса пыракан А.Я.Филимонова тата коллектив членĕсем.