Тĕне ĕненекенсемпе калаçнă май Шупашкар тата Чăваш митрополичĕ Савватий çак сăмахсене тĕп вырăна кăларчĕ.

Вырсарникун вăл Вăрнарти нумай асап тÿснĕ çветтуй Георгий +ĕнтерÿçĕ Чиркĕвĕнче кĕлĕ ирттерчĕ.

Чăваш митрополийĕн пуçлăхне Савватие Вăрнар çĕрĕ çинче район администрацийĕн пуçлăхĕ Андрей Тихонов ырă сунса кĕтсе илчĕ. Владыкăна кĕлĕ ирттерме Калининăри, Вăрнарти тата Енĕшри Чиркÿсен настоятелĕсем Сергий Моряков, Александр Панзин протиерейсем тата Алексий Михайлов иерей та пулăшрĕç. Литурги вăхăтĕнче çветтуй православи пĕрлĕхĕ тата усал чир-чĕре сарăлма парас марри пирки Турра уйрăммăн кĕл турĕç.

Службăна Вăрнарăн çĕнĕ чиркĕвне хута янăранпа 10 çул çывхарнипе (сентябрьте пулать) çыхăнтарчĕç. Ун настоятелĕ Александр атте владыкăна ятарласа пĕçернĕ просфор тата чечек çыххи парнелерĕ. Савватий Вăрнар пачăшкине храма çĕклессипе-аталантарассипе çыхăннă пысăк ĕçшĕн тав турĕ, Турă умĕнчи ырă ĕçсене малалла та тăсма ăнăçу сунчĕ. Вăл çавăн пекех Вырсарни шкулне те манса хăвармарĕ. «Ковчега» çÿрекенсем митрополита сăвă-юрăпа савăнтарчĕç. Ун директорĕ Светлана Иванова вара Савватий митрополитран Тав çырăвне тивĕçрĕ.

Владыка Турра ĕненекенсемпе уççăн калаçрĕ, пухăннисене вăл çынна, кирек мĕнле нĕрсĕр пулсан та, юратма вĕренме чĕнсе каларĕ. «Енчен те эпир çынна тиркетпĕр, унран пăрăнатпăр пулсан пирĕн чĕресем пушă. Чи малтанах хамăрăн чунсене тасатмалла, çынсен çитĕнĕвĕсемпе çитменлĕхĕсене йышăнма вĕренмелле. Унсăрăн чиркĕве çÿрени, кĕлĕ вулани кăна çителĕксĕр пулĕ», – терĕ вăл.

Савватий Вăрнар çĕрĕшĕн çывăх çын. Йăхĕ Кÿстÿмĕр тăрăхĕнчен. Ашшĕ, Геннадий атте, нумай çул Иртеменкассинче, унтан Шупашкарта пачăшкăра ĕçленĕ. Савватин икĕ пиччĕшĕ те настоятельсем: Иван атте – Алтышевăра, Георгий атте – Улатăрта.

Светлана ЧИКМЯКОВА.