Вунă çултах компьютер салатса пуçтарма пĕлетĕн-и, компьютер программине пула тĕрлĕ вăйăсем шутлаятăн-и, социаллă сетьре çын вырăнне ятарлă робот-программа калаçнине сиснĕ-и, интернетра хăвăрăн даннăйсене хÿтĕлеме пĕлетĕр-и, вырăнтан тапранмасăр виртуаллă экскурсие тухас килет-и?

Паянхи цифра ĕмĕрĕнче ачасем хăйсен пултарулăхне тĕрлĕ енлĕ туптаççĕ. Ку енĕпе вĕсене IT-Куб хытах пулăшать. Иртнĕ вĕренÿ çулĕн пуçламăшĕнче уçăлнăскер, вĕренекенсене вăл технологисемпе аван туслаштарчĕ. Çакна вĕсем иртнĕ эрнере пĕтĕмлетÿллĕ «Проектсен ярмăрккинче» кăтартса пачĕç.

Пĕтĕмпе унта 26 проект хутшăнчĕ. Ачасем хăйсен ĕçĕсене тĕрлĕ онлайн-сервиссене, приложенисене, программăсене усă курса хатĕрленĕ. Нумайăшне пурнăçра та ĕçе кĕртме пулать, сăмахран, робот-уборщика. Ку – Богдан Забраевăн ĕçĕ. Дарья Никитинапа Василиса Нарышкина, ак, кĕçĕн çулхисем валли «Угадай-ка» вĕрентÿллĕ вăйă хатĕрленĕ. Дарья тата Дмитрий Фирсовсем Вăрнарти историпе краеведени музейне «курава» чĕнеççĕ тата ыт.те.

Ачасен ĕçне экспертсен пысăк ушкăнĕ хакларĕ. Вăл шутра Шупашкарти тата Çĕнĕ Шупашкарти «Кванториум» технопарксен, Канашри IT-Куб представителĕсем те.

Чи маттуррисене грамотăсем тата хаклă парнесем тивĕçрĕç. 1-мĕш вырăна тухнисене Шупашкарти «Форт Диалог» филиалĕ чысларĕ.

Çавăн пекех IT-Кубăн ытти партнерĕсем те хавхалантарчĕç. Район администрацийĕн пуçлăхĕн заместителĕ – вĕрентÿ пайĕн пуçлăхĕ Денис Трофимов, Вăрнарти ял хуçалăх техникумĕн директорĕ Ольга Львова, IT-Куб директорĕ Алексей Фирсов малашне те çитĕнÿсем патне ăнтăлма ăнăçу сунчĕç.

Светлана ЧИКМЯКОВА.