Депутатсен районти Пухăвĕн ытларикун иртнĕ ларăвĕнче бюджет кăтартăвĕсене улшăнусем кĕртесси тĕп ыйтăва тухнă. Пĕтĕмпе вара кун йĕркине депутатсем татса памалли 6 ыйтăва кĕртнĕ. Ларăва район пуçлăхĕ – Пуху председателĕ Владимир Яковлев ертсе пынă, ун ĕçне ял-хула поселенийĕсен пуçлăхĕсем те хутшăннă.

Район администрацийĕн финанс пайĕн пуçлăхĕн заместителĕ Ольга Семенова пĕлтернĕ тăрăх, тупăш тата тăкак виçисен улшăнăвĕ кăçалхи тата çитес икĕ çуллăх планлă бюджетсене пырса тивеççĕ. Çапла майпа, бюджета укçа-тенкĕ 20,7 млн тенкĕ ытларах кĕмелле, тăкаксем те нумайрах – 20,8 млн тенкĕ чухлĕ. Кăçал укçа-тенкĕн тĕп пайĕ район экономикин уйрăм сферисен аталанăвне расхутланать. Сăмахран, Чăваш ен Пуçлăхĕн Гранчĕпе тивĕçнĕ 10,5 млн тенкĕрен 9,9 миллионне поселокри çулсемпе тротуарсен юсавне пурнăçлама, хăтлăлăх кĕртме уйăрĕç. 600 пин тенкипе Вăрнар районĕн инвестици паспортне йĕркелеме усă курĕç.

Вĕрентÿ учрежденийĕсен пурлăхпа техника базине пуянлатасси, юсавĕ те тимлĕхре% ку тĕллевпе 4181,4 пин тенкĕ уйăрма палăртаççĕ. Вăрнарти 1-мĕш шкул пристройĕн проектпа-смета документацине хатĕрлеме 2016,3 пин тенкĕ пăхса хăварнă. Малашлăхра район архивĕ хăй тĕллĕн муниципаллă бюджет учрежденийĕ пулĕ – ăна туса хума 417 пин тенкĕ тăкакламалла. Кăçал çавăн пекех физкультурăпа спорт мероприятийĕсене йĕркелеме те расхутсем 350 пин тенкĕ таран ÿсĕç. Поселенисен бюджечĕсен шайлашăвне тивĕçтерме вара 3223,4 пин тенкĕ кайĕ.

Мĕнпур улшăнăва шута илсен, бюджета пухăнмалли тупăш калăпăшĕ 655 520 401,20 тенкĕ пуласса прогнозлаççĕ, тăкаксен виçи – 762 081 259,04 тенкĕ.

Депутатсем район ертÿлĕхĕ умĕнче çивĕч ыйтусене те çĕкленĕ. Сăмахран, чылай çĕрте автомобиль çулĕсем айăккипе курăк ашкăрни пирки. Сиенлĕ пултранпа кĕрешессине те кая хăвармалла мар – вăрă тăкма хатĕрленекен шурă «пуçĕсем» унта та кунта курăнса лараççĕ. Райадминистраци пуçлăхĕ Андрей Тихонов пĕлтернĕ тăрăх, çулсене пăхса тăракан организацисене вĕсене пахалăхлă тытса тăмалли пирки асăрхаттарнă. Тепĕр чухне ку енĕпе претензиллĕ çырусемпе те тухма тивет. Ял хуçалăхĕпе экологи пайĕн пуçлăхĕ Вячеслав Горбунов район территорийĕнче пултран культурине тĕп тума 850 пин тенкĕ уйăрнине каланă. Ку енĕпе ĕçсем пыраççĕ ĕнтĕ.

Ирина ЯКОВЛЕВА.