Яваплăх çинчен шутла!

Интернетра, чăн та, вакцинаци хыççăн çынна тĕрлĕ амаксем аптăратнă текен хыпарсем нумай: «урисем утма пăрахнă», «чĕри чарăнса ларнă», «тромбсем йĕркеленнĕ» йышшисем. «Паян прививка тутарнисен йышĕ ÿссех пырать. Сирĕн практикăра Интернетри «хăратмăшсенчи» пек тĕслĕхсем пулнă-и?» – виçĕмкун çак ыйту «тÿрĕ лини» вăхăтĕнче, ахăртнех, тĕп вырăна тухрĕ.

Вакцинаци ыйтăвĕсемпе кунашкал формата йĕркелени ахальтен мар. Ку вăхăтра халăхра икĕ тĕрлĕ шухăш çÿрет: пĕрисем ковидран яваплăха туйса хÿтĕленеççĕ, теприсем вара усал сас-хура сараççĕ. «Тÿрĕ лини» итлекенсене пулăшма тăрăшрĕ. Тÿрĕ эфирта ыйтусене Чăваш ен Министрсен Кабинечĕн председателĕн заместителĕ – вĕрентÿ министрĕ Алла Салаева, сывлăх сыхлавĕн министрĕ Владимир Степанов, Роспотребнадзорăн Чăваш енри управленийĕн ертÿçин тивĕçĕсене пурнăçлакан Вера Головач, сиплев учрежденийĕсен тухтăрĕсем хуравларĕç.

Кутăнла политикăна саракансен тĕрĕсмарлăхне специалистсем пуçĕпех сирчĕç. 2-мĕш хула больницин тĕп врачĕ Лидия Веденеева: «Паянхи кун тĕлне пирĕн учрежденире 6500 доза прививка тунă. Хăрушă последствисем пĕрре те пулман! Пурте чĕрĕ!» – терĕ процедура ирттериччен пурне те харпăр хăйне мĕнле тытмаллине ăнлантарни çинчен пĕлтерсе. «Официаллă çăлкуçсене, специалистсене итлемелле, сас-хурана ĕненмелле мар», – пĕр шухăшлăн палăртрĕç тÿрĕ эфира хутшăнакансем.

– Вакцинаци – хамăр пурнăçа сыхласа хăваракан пĕртен-пĕр мел. Хальхи вăхăтра республикăри 160 пин çын вакцинаци тутарнă. Пысăк цифра пек, анчах та ку прививка тутарма тивĕçлĕ çынсен 26 проценчĕ кăна. Коллективлă иммунитет пултăр тесен 60 проценчĕн иммунизациленмелле, – терĕ вице-премьер Алла Салаева.

«Тÿрĕ линие» хутшăнакансем вакцинăсем пурте лайăххине, вĕсенче чĕрĕ вируссем çуккине палăртрĕç. Хăшĕсен прививка хыççăн гриппа чирленĕ пек симптомсем пулма пултараççĕ. Ку реакци организмшăн сиенлĕ мар.

Уйрăмах вăрах чирпе аптăракансен, аслă ÿсĕмрисен, теветкеллĕх ушкăнĕнчисен вакцинаци тутармаллах, палăртрĕç эфирта.