Ял пурнăçĕ хуларинчен кая пулмалла мар. Тĕп хуласенчен аякра та инфраструктура паянхи куна тивĕçтертĕр, вĕрентÿ-медицина пахалăхĕ ан чăхăмлатăр, çынсен çавăн пекех культура пуянлăхĕпе паллашма май пултăр... Çак тĕллевсем пĕтĕмпех республика Правительстви малашлăха палăртнă ĕçсене хывăннă. Харăсах, пĕр самантра мар пулсан та, ял çыннисен ыйтăвĕсене татса памалли майсене тупмаллах, тесе палăртать Чăваш ен Пуçлăхĕ Олег Николаев.

Анчах пĕр-пĕр уйрăм территорире пурăнакансене мĕн хумхантарать, мĕнле улшăнусене кĕтеççĕ вĕсем – влаç органĕсем вырăнта ирттерекен тĕлпулусенче уçăмлă курăнать. Халăхпа куçа-куçăн калаçни, тĕрĕссипе, проблемăллă ыйтусене çиеле кăларма пулăшать. Çак тĕллевпе ĕнтĕ кĕçнерникун Вăрнар тăрăхĕнче ЧР Министрсен Кабинечĕн Председателĕн заместителĕ – вĕрентÿ министрĕ Алла Салаева ĕçлĕ визитпа пулчĕ. Унпа пĕрле районти хăшпĕр ял поселенийĕсен ĕçĕ-хĕлĕпе культура, национальноçсен тата архив ĕçĕсен министрĕ Светлана Каликова та паллашрĕ.

Пĕрремĕш тĕлпулу Пăртасра иртрĕ. Влаç представителĕсене ял илемĕ пулса тăнă хÿхĕм культура çуртĕнче кĕтсе илчĕç. Пĕлтĕр кăна «Культура» наци проекчĕпе çĕкленнĕ клуб – шăпах патшалăх яллă тăрăхсенче культура «вучахĕсене» çĕнĕ варкăш кĕртессишĕн тăрăшнине кăтартакан пулăм. Алла Салаева вице-премьер çутă та хăтлă çурт аслисемшĕн те, ача-пăчашăн та пĕрлехи кану е ăшă тĕлпулусен вырăнĕ пулса тăрасса шаннине каларĕ.

– Культура çурчĕ чăнах та аван, паха çĕкленчĕ. Ăшăлăх, ырăлăх туйăнать тÿрех кунта. Çапах та, куратăп, тавралли территорие хăтлăлатассипе ыйтусем пур-ха. Çавăн пекех «ăш-чикне», сценăна йĕркелесе çитерессипе те... Район, ял поселенийĕн ертÿлĕхĕ ку ыйтăва тимлĕхрех тытни ĕçе тăсса ямасăр вĕçне-хĕрне çитерессе шанма май парать», – терĕ Алла Леонидовна. Ун сăмахĕсене çирĕплетсе Пăртас ял поселенийĕн пуçлăхĕ Николай Петров та клуб таврашне тирпей-илем кĕртессипе сметăпа проект документацийĕ хатĕррине пĕлтерчĕ. Алла Салаева кăткăс самантсенче пулăшма пулчĕ.

Республикăри социаллă сфера тытăмĕшĕн яваплă шутланнă май, вице-премьер юлашки вăхăтра инфраструктура аталанăвне чылай вăй хывнине, проблемăсене калăпăшлă татса пама тăрăшнине уйрăммăн палăртрĕ. Çакна, сăмахран, шкулсен çĕнелĕвĕн тĕслĕхĕнче те куратпăр. Вĕсен тĕплĕ юсавне пурнăçланă май тавралли территорие хăтлăлатассине те, кунти вĕрентÿ процесне лайăхлатма тата ачасене тĕрлĕ енлĕ аталанма пулăшакан условисемпе тивĕçтерессине те шута илеççĕ.

Пăртассем патне вице-премьер пушă алăпа килмен – вăл савăнăçлă миссие кăмăлтан пурнăçларĕ% вырăнти шкулти вырăс чĕлхипе литературин учительне Анастасия Мурашевана тата Ольга Иванова библиотекаре Вĕрентÿ министерствин Тавĕпе наградăларĕ.

Пăртасри çĕнĕ клуб çак кун сумлă артистсене йышăнчĕ. Сцена çинчен ял çыннисене Чăваш патшалăх оперăпа балет театрĕн солисчĕсем хăйсен хÿхĕм сассисемпе савăнтарчĕç.

Çĕрпел ял тăрăхĕнче хăнасене чи малтанах паллă галерейăна чĕнчĕç. Картинăсен пуянлăхĕ вице-премьера Алла Салаевана чăннипех тыткăнларĕ. Кунта Тăван çĕршывăн Аслă вăрçин ветеранĕсен 100-е яхăн сăнĕ çырăннă. Ÿкерчĕксене паллă художник Николай Карачарсков ертсе пынă ушкăн 1970 çулсен варринче çырнă. Хыççăн вăл темиçе портретпа тата чăваш ÿнерçисен ытти репродукцийĕпе пуянланнă.

Алла Леонидовна, Çĕрпел шкулĕнчи ИЗО учителĕн Надежда Андрееван кăсăклă историне итленĕ тата сала çыннисемпе калаçнă май, кунти мĕнпур ĕçе «цифрăлама» сĕнчĕ. Галерейăпа ытларах çын паллашма пултартăр, терĕ. Кунта истори чĕррĕн тапса тăнине çирĕплетрĕ.

Иртнĕ çул Çĕрпелте культура çурчĕн шал енĕ юсавра çĕнелнĕ. Анчах та, ял тăрăхĕн пуçлăхĕ Сергей Петров пĕлтернĕ тăрăх, хăтлăх енĕпе пурнăçламалли ĕç поселенире нумай. Вырăнти шкулта, акă, 50 млн тенкĕлĕх тĕплĕ юсав ирттересшĕн. Пĕтĕмĕшле практика врачĕн офисĕнче те çĕнетÿ ĕçĕсем пурнăçламалла... Алла Салаева паянхи кун Чăваш ен Правительстви ялсен территорийĕсене аталантарассине уйрăмах тимлĕх уйăрнине палăртрĕ. Çĕнтерÿ паркне çитсе курнă май, вăл хăйĕн лайăх шухăшĕсене сĕнчĕ% территорие Çĕнтерÿ кунĕнче кăна мар, ытти вăхăтра та халăх килсе çÿретĕр тесен канупа илемлĕх формисене ĕçе кĕртмелле. Çавăн пекех вăл çĕрпелсене ку вырăна культурăпа вĕрентÿ, социаллă учрежденисене çыхăнтаракан тĕп площаде комплекслă хăтлăлатма сĕнчĕ. «Чи кирли – хăрама кирлĕ мар. Шухăшсене пурнăçа кĕртессишĕн тăрăшмалла», – терĕ вăл ĕнентерÿллĕ проект хатĕрлеме чĕнсе тата ку енĕпе пулăшма хатĕррине шантарса.

Çĕрпелте те Алла Салаева Светлана Каликова министрпа, район администрацийĕн пуçлăхĕпе Андрей Тихоновпа пĕрле ĕç хастарĕсене Тав çырăвĕсемпе чысларĕ. Вĕсене «Янгорчино» ЯХПК ертÿçи Геннадий Романов тата ял старости Николай Феофанов тивĕçрĕç. Ку ялта та Чăваш патшалăх оперăпа балет театрĕн артисчĕсене тăвăллăн алă çупса йышăнчĕç.

Ирина ЯКОВЛЕВА.

Светлана ЧИКМЯКОВА.