Шыв, чăнах та, организма уçăлтаракан, сиплекен асамлă япала. Анчах, ан манăр, çирĕп ăс-тăнпа, сыхлăха пăхăнса шыва кĕни кăна усă парать. Сăмахран, 18 градусран сивĕ мар шывра тата çилсĕр янкăр (25 градусран ăшăрах) çанталăкра кăна ишме пуçлама юрать. Çавăн пекех – апат çинĕ хыççăн сехет çурă иртсен çеç. Хăвăрăн ывăннă, тарланă пулмалла мар. Ишме пĕлместĕр-тĕк, вĕрсе хăпартнă матрассемпе çавракасене ан шанăр.

Çак сĕнÿсене пăхăнсан аван:

– Ятарласа ирĕк панă вырăнсенче кăна   ишме юрать.

– Пĕлмен вырăнсенче ан чăмăр (пĕренесем, туратсем, чулсем пулма пултараççĕ); шурлăхлă тата курăклă çĕрте шыва ан кĕрĕр.

– Кимĕсенчен çакланма, навигаци оборудованийĕн паллисем çине хăпарма, чару вырăнĕсенчен иртсе кайма юрамасть.

– Çил-тăвăллă çанталăкра тата хумсем вăйлă чух ишни те хăрушă.

– Пулăшу кирлĕ тесе ахальтен суйса ан иртĕхĕр.

– Енчен те вăйлă юхăма лекрĕр-тĕк, хирĕç ан ишĕр – юхăмпа пĕрле çыран хĕрнелле тухма тăрăшăр.

– Авăра лексен хăраса ÿкмелле мар: сывлăш нумайрах пухса чăммалла та тăрук унран аяккарах тухма хăтланмалла.

– Шăнăр туртса лартрĕ-тĕк, çурăм çине выртăр та çыран еннелле ишĕр. Çав вăхăтрах мышцăсене сăтăрса çемçетĕр.

Ачан шыв-шур хĕрринче пĕччен çÿреме юрамасть. Кирек хăçан та кунта сыхă пул%

– шыва ÿкес хăрушлăх пур вырăнсенчен аякра çÿре;

- вуçех пĕлместĕн е япăх ишетĕн-тĕк, тарăн çĕре ан кĕр;

- шанчăксăр вырăнта ан чăм, буексенчен ан каç;

- шывра пĕр-пĕрне çаклатса-путарса аташма юрамасть;

- пĕренесемпе хăмасем, хăвăр тунă сулăсем çинче ан ярăнăр;

- кимĕпе ишес килет пулсан, малтан хăрушсăрлăх правилисене вĕренĕр.

Моторлă катерсемпе тата кимĕсемпе çÿреме вара ятарлă права илнисен кăна ирĕк пур.

Енчен те çын путать-тĕк, ăна ишекен япала пăрахса парăр, хавхалантарăр, пулăшу чĕнĕр. Ун патне ишсе пынă чух шыв юхăмне шута илĕр. Путакан çын хăйне тĕрĕслевре тытаймасть пулсан, хыçалтан ишсе пырса пуçĕнчен, алă айĕнчен, çÿçрен ярса тытса çыран патнелле куçармалла. Шывран кăларсан пĕрремĕш пулăшу памалла, сывлăш çитменнине пĕтермелле.

Ф. ТИМОФЕЕВ,

район администрацийĕн ятарлă программăсен пайĕн пуçлăхĕ.