«Коронавирус штамĕсем пирĕн патра та сарăлаççĕ. Вĕсем чирлесе ирттернисене те, антителасем пуррисене те ерме пултараççĕ. Инфекцинчен вакцинаци кăна хÿтĕлĕ», – тенĕ ЧР Пуçлăхĕ Олег Николаев коронавирус сарăлассине чарас енĕпе ĕçлекен оперативлă штабăн черетлĕ ларăвĕнче. Олег Алексеевич палăртнă тăрăх, лару-тăру йывăрланса пырать, чирлекенсен шучĕ ÿсме тытăннă.

Сывлăх сыхлавĕн министрĕн пĕрремĕш çумĕн тивĕçĕсене пурнăçлакан Алексей Кизилов пĕлтернĕ тăрăх, хальхи вăхăтра стационарта коронавирусран 1470 çын сипленет, вĕсенчен 18-шĕ ИВЛ-аппаратпа сывлать. 2200 çын килте медпулăшу илет. Чирлекенсен шучĕ ÿснĕ май республикăри туберкулез диспансерĕнче, Шупашкар хулинчи 2-мĕш тата Шупашкар районĕн тĕп больницисенче хушма койкăсем хатĕрленĕ. Пациентсемпе ĕçлемешкĕн 111 ординатора тата 339 студента явăçтарнă. Коронавируспа нушаланакансен 54 проценчĕ – аслă ÿсĕмри çынсем, анчах юлашки вăхăтра çамрăксем те чирлеме тытăннă. Республикăра вакцинацин 56 пункчĕ ĕçлет. Вĕсем пациентсене канмалли кунсенче те йышăнаççĕ. Хальлĕхе 144165 çын (вĕсенчен 70 пинĕшĕ – 60 çултан иртнисем) прививка тутарнă. Алла Салаева вице-премьерăн сăмахĕпе, вакцинаци тăвас енĕпе Красноармейски, Канаш, Хĕрлĕ Чутай, Вăрнар, Сĕнтĕрвăрри районĕсем, Улатăр хулипе районĕ малта пыраççĕ. Министерствăсемпе вĕсене пăхăнса тăракан организацисенче ĕçлекен 18 пин ытла çын прививка тутарнă. Алла Леонидовна пĕлтернĕ тăрăх, юлашки вăхăтра мобильлĕ ушкăнсем рейда сахал тухнă. Вăл общество вырăнĕсенче асăрханулăх мерисене епле пăхăннине тĕрĕслессине вăйлатма хушнă.

Роспотребнадзорăн Чăваш енри управленийĕн пуçлăхĕ Надежда Луговская пĕлтернĕ тăрăх, коронавируспа Шупашкар хулинче (48 процент), Улатăр хулинче, Вăрнар, Красноармейски, Пăрачкав районĕсенче ытларах чирлеççĕ. Офиссенче, банксенче, культура учрежденийĕсенче тăрăшакансене чир ытларах ернĕ. Чăваш енре Британи тата Инди штамĕсем (9 тата 6 тĕслĕх) тупса палăртнă. Роспотребнадзор массăллă мероприятисене сахаллатма, апатлану предприятийĕсен ĕç вăхăтне (çĕрле 1 сехетрен пуçласа ирхи 6 сехетчен) кĕскетме, фудкортсен ĕçне, ташă каçĕсем ирттерекен вырăнсене вăхăтлăх чарма, курав залĕсемпе кинотеатрсене пыракансен шутне 50 процент чакарма, 60 çултан аслăраххисене тата ача кĕтекен амăшĕсене дистанци мелĕпе ĕçлемешкĕн куçарма сĕнет. Çавăн пекех общество апатланăвĕн предприятийĕсенче ковидсăр зонăсем тума палăртнă: кафе-ресторанта прививка тутарманнисене тата коронавирус çуккине ĕнентерекен справкăсăр кĕртме пăрахĕç.

Сăмах май, коронавируслисем валли Чăваш енри 14 медучрежденире 1947 койка хатĕрленĕ, вĕсенчен 327-шĕ пушă.