Çак кунсенче Енĕшре пурăнакан Антонина Семеновнапа Вениамин Андреевич Андреевсем пĕр çемьене чăмăртаннăранпа 52 çул çитрĕ. Пĕрлехи пурнăç тăршшĕпех вĕсем çума-çумăн йывăрлăхсене парăнтарса, кашни савăнăçлă саманта пĕрле пайласа, юратăва упраса, ачисене, мăнукĕсене тимлĕх уйăрса пурăнаççĕ.

Ку çемьене лайăх пĕлнĕрен пулĕ – вĕсем пирки çырма та питĕ кăмăллă. Сăпайлă, çав тери ыр кăмăллă, ĕçчен мăшăр.

Антонина Семеновна вăр-варлăхĕпе, йăрăлăхĕпе асра юлнă. Ĕçе шкул умĕнчен иртсе çÿретчĕç те вăл яланах хыпкаланни курăнатчĕ. Колхоз ĕçне те, килтине те ĕлкĕрес тенĕ ĕнтĕ.

Вăл Канаш районĕнчи Имель ялĕнче вăрçă тухнă çул çуралнă. Çемьене ку вăхăтра çăмăл килмен, нумай куççуль тăктарнă. Ашшĕне тÿрех вăрçа илнĕ. Хуйхă пĕччен çÿремест теççĕ те, тĕрĕсех пулĕ. Антонина Семеновнан тăхăр пĕртăванĕнчен виççĕшĕ кăна чĕрĕ юлнă.

Антонина Семеновна шкулта çичĕ класс пĕтернĕ, анчах малалла вĕренме май килмен, вăл чăпта çапма кÿлĕннĕ. Каярахпа ĕçчен хĕрачана фермăна сыснасем пăхма чĕннĕ. Яваплăха яланах мала хунă вăл, çапла пулмаллине пĕчĕкрен туйса ÿснĕ. «Сыснасене апат çитмесрен хăраса пĕр харăс тăватă витре йăтаттăмччĕ% картлампа иккĕ тата алăсенче», – аса илет вăл.

Çемье пуçĕ те ял-йышра хисепе ĕçченлĕхĕпе çĕнсе илнĕ. Вениамин Андреевич Енĕш ялĕнчех çуралса ÿснĕ. Шкул хыççăн тĕреклĕ çамрăк тÿрех колхоза вырнаçнă. Малтанхи вăхăтра бригадăна çÿренĕ. 1969 çултан тытăнса хуçалăх саланичченех скотникра тăрăшнă. Хуçасен шутĕнче яланах ырăпа палăрнă, ăна тĕслĕх вырăнне лартнă.

Антонина Семеновнана Вениамин Андреевич Ямаш пасарĕнче пĕрре курсах килĕштернĕ. Хĕре вăл тепĕр куннех çураçма пынă. Кĕçех туй та кĕрлеттернĕ.

Колхоз ĕçĕнчен нихăçан та юлман вĕсем. Фермăра ĕçленĕ вăхăтра тÿпепе паракан хăмла, çĕрулми, кăшман уйĕсенче те пайтах тар тăкнă. «Звезда» колхозăн маттурĕсем иккĕшĕ те «Ĕç ветеранĕ» ята тивĕçнĕ.

Андреевсем çут тĕнчене виçĕ пукане пек хĕр парнеленĕ. Вĕсем пурте вĕренсе тухса хăйсене пурнăçра тупнă. Икĕ хĕрĕ пурнăçне медицинăпа çыхăнтарнă. Асли, Екатерина, Елчĕк район тĕп больницинче медсестрара тăрăшать. Надежда – Енĕшри фельдшерпа акушер пунктĕнче санитаркăра. Ольга Красноармейски салинче çĕвĕçре вăй хурать. Ачисене ашшĕ-амăшĕн ырăлăхĕ, çепĕçлĕхĕ, çынлăхĕ йăлтах куçнă. Вĕсем те ĕçре те, ял-йышра та хисепре.

Паянхи кун та ахаль лармаççĕ Андреевсем. Пахча-анкарти çитĕнтереççĕ, сад ĕрчетеççĕ.

Ватăсене куç тулли çичĕ мăнукĕпе пилĕк кĕçĕн мăнукĕ савăнтарсах тăраççĕ, тата та нумай çул пурăнма вăй-хăват хушаççĕ.

Иртнĕ эрнере Андреевсем патĕнче район администрацийĕн пуçлăхĕ Андрей Тихонов пулнă, çирĕп те пуриншĕн те тĕслĕх пулса тăракан çемьене тав тунă, вĕсенни пек çемьесем ытларах пулни обществăн никĕсĕ пулнине палăртнă.

Антонина Семеновнапа Вениамин Андреевича Çемье, юратупа шанчăклăх кунĕ ячĕпе чĕререн саламлатпăр! Телей, вăрăм кун-çул, хаваслăх сунатпăр.

Светлана ЧИКМЯКОВА.