Июлĕн 3-мĕшĕ тахçанхи пĕрлехи мăнаçлă çĕршыв историйĕнче паллă пулăмсемпе çырăнса юлнă: тăванла Белорусси çĕрĕ çинчен нимĕç фашисчĕсене тасатса кăларнă. Çак кун тĕлне Кивçурт Енĕшри Совет Союзĕн Геройĕн, шăпах ку çапăçусене хутшăннă С. Илларионовăн музейĕнче кăсăклă курав уçăлнă. «Аслă Çĕнтерĕвĕн çар пуçĕсем: «Багратион» операци» ят панă ăна.

Пуçаруçи – вырăнти хастар, музей ертÿçи Вячеслав Алексеев. Ял çыннисене куравпа паллаштарнă май вăл пирĕн командовани ку пĕлтерĕшлĕ операцие мĕнле хатĕрлени пирки интереслĕ фактсене уçса панă.   Ăна питĕ тĕплĕ, хĕрÿ тавлашура хатĕрленĕ-мĕн.

Малтанах пĕр вырăнтан – Днепр çинчи плацдармран – тапăнма тĕллев пулнă. Анчах та ку тавралăха тимлĕ тишкернĕ хыççăн Рокоссовский маршал икĕ участокран тăшмана кисретме хытарсах сĕннĕ. Вăл Полесье тăрăхĕнчи шурлăхсенче урăхла майпа фашистсене çĕнтерме май çуккине лайăх ăнланнă. Çапах та Сталин 1-мĕш Белорусси фрончĕн командующийĕпе килĕшмен иккен. Рокоссовские вăл икĕ хутчен кÿршĕ пÿлĕме «шутласа пăхма» янă. Маршал хăйĕн шухăшĕнчен пăрăнманнине кура кăна «Багратион» операцие çирĕплетнĕ.

Белорусси халăхне ирĕке кăларассишĕн пынă юнлă хирĕçтăрусенче пирĕн ентешсем те хăйсене шеллемесĕр çапăçнă. Кивçурт Енĕшри Степан Илларионов, акă, Хĕвеланăç Двина юханшывĕ урлă пĕрремĕш каçнисен йышĕнче. Кунта кăтартнă паттăрлăхшăн ĕнтĕ ăна вилнĕ хыççăн Ылтăн çăлтăрпа тата СССР Геройĕн ячĕпе наградăланă.

     Куравра тепĕр мухтавлă ентешĕмĕрĕн сăнÿкерчĕкĕ те пур. Вăл – Павел Данилович Данилов – 31-мĕш Гварди полкĕн разведчикĕ, 3-мĕш Белорусси фрончĕн ретĕнче «Багратион» операцине хутшăннăскер. Аслă Çĕнтерĕве Павел Данилов Кенигсберг хулинче кĕтсе илнĕ. Хĕрлĕ Çăлтăр орденĕн икĕ хутчен, 1 тата 2 степень Тăван çĕршывăн Аслă вăрçин орденĕсен кавалерĕ. Вăрçă хыççăн тăван яла таврăннă, колхозра ĕçленĕ.

Районти музей директорĕ Елена Шарипова Степан Илларионов Геройăн музейне йĕркелесе тытса пыракансем чăннипех те хаклă та сăваплă ĕç тунине палăртнă. Истори астăвăмне сыхласа хăварассипе çамрăксемпе ирттерекен патриотизм ĕçĕшĕн уйрăмах чĕререн тав тунă.

Ирина ЯКОВЛЕВА.