Ачалăх, яшлăх – телейлĕ вăхăтсем. Кăмăл та савăк, сывлăх та çирĕп. Шăрăх та хăратаймасть. Ÿт-пÿ хăмăрланса кайичченех хĕвел питтинче пиçетĕн. Вăй-халĕ те çăлкуç пек тапса тăрать.

– Эпир каннă чух «Çĕнтерÿ çулне» тÿрех алла илеттĕмĕр. Сак çине ларсах вулаттăмăр, – аса илчĕ Вăрнарта пурăнакан Ангелина Иванова ачалăха. – Касу-кĕтÿ пăхнă чух та район хаçачĕ çумрах пулнă.

Вăл Ярмушкара çуралса ÿснĕ. Çемьере асли пулнă май шăллĕпе йăмăкĕсене те «Çĕнтерÿ çулĕпе» туслаштарнă. Хаçат вулакан – кун-çул уттипе тан утакан. Этеме чун çимĕçĕ кирлине пĕчĕкренех аван ăнланнăскер, Ангелина Васильевна халĕ хăйĕн ачисене те çапла ăс-тăн парать: «Хыпар-хăнар тĕрлĕ интернет çăлкуçĕсенче пулсан та «Çĕнтерÿ çулне» вуламаллах», – тет вăл.

Хĕрĕсем Анеттăпа Адриана 2-мĕш вăтам шкулта пĕлÿ пухаççĕ. Ашшĕ-амăшĕн тăван чĕлхине лайăх пĕлеççĕ. Чăваш чĕлхипе ирттерекен олимпиадăсене хастар хутшăнаççĕ. Творчествăлла пултарулăха та аталантараççĕ.   Анетта, районти искусствăсен шкулĕнче ăс пухаканскер, «Çĕнтерÿ çулĕн» иртнĕ шăматкунхи номерĕн страницисене уçсанах хаваслăн кăшкăрса ячĕ:

– Акă, манăн юратнă преподаватель Елена Алексеевна Сухарева!

Тăван хаçат тарават тăван пекех. Вăл кăмăла уçса ярать. Паллакан сăнсене тĕрлĕ сайтсенче куратăн пулсан та хаçатра пичетленни уйрăмах хаклă.

Адриана та «Çĕнтерÿ çулĕпе» туслă. Вунă класс пĕтернĕ хĕр çамрăксем пирки çырнине вулама юратать.

Хаçат ырра вĕрентет. Çавăнпа та амăшĕ хĕрĕсемшĕн хĕпĕртет. Вĕсенчен Тăван çĕршыва юрăхлă граждансем пулса çитĕнессе çирĕппĕн шанать.

Ангелина Васильевнăпа мăшăрĕ уйрăм предпринимательсем. Пушă вăхăт пулсанах хĕрĕсемпе Ярмушкана васкаççĕ. Пахча-анкартире тăрăшаççĕ.

Елена ПОРФИРЬЕВА.