«Чăваш енри хĕрарăмсен союзĕ» общество организацийĕ пуçарнипе тата «Пĕрле» ыркăмăллăх фончĕ пулăшнипе республикăра ирттернĕ «Эпĕ – хĕрарăм» конкурса вăрнарсем те хастар хутшăннă. Маттуррисенчен пĕри – Людмила Федоровна Васильева.

Вăл ытти этемлĕхĕн черченкĕ çурри пекех видео урлă хăйĕн пирки каласа панă. Людмила Федоровна халăха социаллă хÿтлĕхпе тивĕçтерекен районти центрăн директорĕнче тăрăшать. Ертÿçĕре икĕ çула яхăн ĕçлет пулин те коллективра ырă ят çĕнсе илнĕ. Людмила Васильева йывăр лару-тăрăва лекнисене, ватăсемпе сусăррисене пулăшассине пысăк тимлĕх уйăрать. Çынсен нуши-тертне лайăх ăнланать. Вăл ырă кăмăллă, пысăк чун-чĕреллĕ.

Пултаруллă ертÿçĕ Ершепуç ял тăрăхĕнче çуралса ÿснĕ. Шкул саккинченех медицина ĕçченĕ пулма ĕмĕтленнĕ. 1988 çулта Кÿстÿмĕрти вăтам шкултан вĕренсе тухнă. Юратнă профессие алла илес тесе Канашри медучилищĕне çул тытнă. Экзаменсенче лайăх паллăсем илнĕ, студент ятне тивĕçнĕ. Медучилищĕрен 1990 çулта вĕренсе тухнă.

1990–2004 çулсенче сывлăх сыхлавĕнче тимленĕ. Медсестра Гиппократ тупине яланах асра тытнă.

Ĕмĕр пурăн, ĕмĕр вĕрен, теççĕ. Людмила Федоровна ĕçленĕ хушăрах аслă шкулта пĕлÿ пухнă. И.Н. Ульянов ячĕллĕ Чăваш патшалăх университетĕнче «Юриспруденци» специальноçе алла илнĕ.

Право ыйтăвĕсене аван ăнкаракан специалист Вăрнарти ял хуçалăх техникумĕнче ĕçлеме пуçăннă. Преподаватель, директорăн воспитани енĕпе тимлекен заместителĕ пулнă.

Ĕç биографийĕ пуян. Людмила Васильева Вăрнарти 1-мĕш вăтам шкулта та тимленĕ. Тăрăшнине кура хисепĕ. Ăна ЧР Вĕрентÿ тата çамрăксен политикин, РФ Вĕрентÿ тата наука министерствисен Хисеп грамотисемпе (2015, 2017) наградăланă.

Людмила Федоровна ĕçре кăна мар, спортра та маттур. Ал ĕç тума та ăста.

Елена ПОРФИРЬЕВА.