Компьютерпа технологи ĕмĕрĕнче пурăнатпăр пулсан та почтăн пĕлтерĕшĕ чакмасть. Ку сферăра вăй хуракансен ĕçĕ анлă: хаçат-журнал çырăнтармалла, пенси укçине кашни уйăхрах вăхăтра çитермелле, коммуналлă тивĕçтерÿсемшĕн тÿлесе татăлма пулăшмалла тата ыттине пурнăçламалла.

Çыхăну уйрăмĕсен пуçлăхĕсем, операторсем, почтальонсем, водительсем тата ытти ĕçченсем хăйсен тивĕçне тÿрĕ кăмăлпа пурнăçлаççĕ. Акă, сăмахран, çырăнтару вунăкунлăхĕсенче те почтальонсен хастарлăхĕ чакмасть. Районта пурăнакансем укçи-тенкине перекетлеччĕр тесе тимлеççĕ, хаçат-журнала йÿнĕ хакпа ытларах çырăнччăр тесе тăрăшаççĕ. Район хыпарçи кашни çемьене çиттĕр тесе тĕллевлĕн ĕçлеççĕ. Халăхпа кăмăллăн калаçаççĕ. «Октябрина Бардасовапа Наталья Токарева çамрăк операторсем тата çынсемпе еплерех вашават»,– илтме тÿр килчĕ почтăна килнисенчен.

Вăрнар почтамчĕн пуçлăхĕ Ирина Михайловна Леонтьева каланă тăрăх, ĕçченсем палăртнă плана тултарассипе ырми-канми тăрăшаççĕ. Кăтартусем ÿсĕмлĕ. Çыхăну уйрăмĕ пурнăç таппипе тан пырать. Почта сечĕсене çĕнетсе улăштараççĕ, çĕнĕ технологисене ĕçе кĕртеççĕ. Специалистсем хăйсен квалификацине тăтăшах ÿстереççĕ. Коллективра пĕр чĕлхе тупса килĕштерсе ĕçлеççĕ.

Вăрнар почтамчĕ Вăрнар тата Йĕпреç районĕсен уйрăмĕсене пĕрлештерет. Професси уявĕ умĕн çыхăну тытăмĕнче ăнăçлă ĕçлекенсем чыс-хисепе тивĕçнĕ. РФ Цифра аталанăвĕн, çыхăну тата массăллă коммуникацисен министерствин Тавĕпе Вăрнар почтамчĕн ертÿçине Ирина Леонтьевана, ЧР Цифра министерствин Хисеп грамотипе Ершепуçĕнчи почта уйрăмĕн пуçлăхне Елена Игнатьевана, çак ведомствăн Тавĕпе Светлана Селиванова почтальона наградăланă. Калас пулать, Елена Геннадьевна Раççейри çыхăну ĕçченĕсен Чăваш енри профсоюзĕн Хисеп грамотине те тивĕçнĕ.

«Почта России» УФПС Тавĕпе Чăрăш Ишекри çыхăну уйрăмĕн пуçлăхне Римма Григорьевана чысланă.

Маттур ĕçченсем татах пур. Почта çыхăнăвĕн Вăрнарти уйрăмĕн пуçлăхĕ Татьяна Павлова та чыс-сумра. Унăн ятне   Раççей Почтин Чăваш енри управленийĕн Хисеп хăми çине кĕртнĕ.

Район администрацийĕн Тавне тивĕçнисем: мобильлĕ ушкăн пуçлăхĕ Надежда Козлова, Александр Степанов оператор тата Кульцаври çыхăну уйрăмĕнчи Антонина Даниловапа Светлана Гончарова почтальонсем.

Елена ПОРФИРЬЕВА.