Шăрăх, сивĕ е йĕпе-сапа, е çил-тăман кунĕпе – Альбина аппа çул çинче. Миçе çухрăм утать-ши вăл?

Альбина Николаевна Николаева Уравăш салинче çуралса ÿснĕ, кунтах шкул пĕтернĕ. Ашшĕпе амăшĕшĕн вăл – кил ăшши, тĕрекĕ, пиччĕшĕпе шăллĕшĕн – хаклă тăванĕ, ывăлĕпе кинĕшĕн – юратнă анне, тăватă мăнукĕшĕн – ытарайми асанне.

Уравăш ял халăхĕшĕн вара – кĕтнĕ хăна. Ăна пурте хапăл тăваççĕ: ватти те, яшши те...

Улттăмĕш çул ĕнтĕ Альбина Николаевна почтальонра вăй хурать. Çынсене республикăра тата районта тухса тăракан хаçат-журнала, коммуналлă ыйтусемпе çыхăннă хутсене, пенси укçине, тĕрлĕ пособие, инçетрен килекен çырусене, налук хучĕсене, интернетпа çырăнса илнĕ тавара валеçет.

Альбина аппана хисеплеççĕ. Ырă кăмăлĕшĕн, шÿтлеме пĕлнĕшĕн, ĕçченлĕхĕшĕн, тăрăшулăхĕшĕн юратаççĕ. Мĕн ыйтнине тĕплĕн ăнлантарса парать вăл. Кÿршĕ-аршăпа сăпайлă, тарават. Ватăпа ватă пек, çамрăкпа çамрăк пек.

Кил карти тулли выльăх-чĕрлĕх усрать, кайăк-кĕшĕк ĕрчетет пăрчăкан пек çивĕч хĕрарăм.

– Шалу укçи пысăках мар, çынпа калаçни пĕтĕм чуна уçса ярать. Хăшпĕр килте хаклă хăнана кĕтнĕ пекех кĕтеççĕ. Пандеми вăхăтĕнче утайман ватăсене çăкăр-тăварпа, апат-çимĕçпе тивĕçтеретпĕр, газ-çутă, налук хучĕсене тÿлесе паратпăр. Шел пулин те, ялта çамрăксем сахаллансах пыраççĕ. Ват çынсен кун-çулĕ те кĕскелсех пырать. Хаçат-журнал тусĕсем те чакаççĕ», – пăшăрханать почтальон.

Альбина Николаева пек ĕçчен, тăван тăрăх шăпи пирки шухăшлакан çынсем тата та нумайрах пулсан ялта тĕтĕм сÿнмĕ. Ăна çирĕп сывлăх, телейлĕ те вăрăм кун-çул сунатăп.

Юлиана НИКИФОРОВА.

Уравăш.