Вăрнар спортсменĕсем сумлă турнирсен пьедесталĕсем çине хăпарма тивĕçни ентешсен чунĕсенче мăнаçлăх туйăмĕ вăратать

Нумаях пулмасть, акă, Çĕрпел хĕрĕ Екатерина Ишова (Горбунова) çăмăл атлетика енĕпе Раççей чемпионатĕнче палăрма пултарчĕ. Чăваш ен çăмăл атлетика шкулĕн воспитанници, тĕнче класлă спорт мастерĕ 5000 метра 2-мĕш результатпа вĕçленĕ – кĕмĕл медале тивĕçнĕ.

Иртнĕ эрнере Чăваш енĕн спортăн пĕрлехи енчĕкне Вăрнар каччи Андрей Львов та сумлă тÿпе хывнă. Мускав облаçĕнчи Воскресенскра спорт туризмĕн çуран дистанцийĕн Пĕтĕм Раççейри ăмăртăвĕнче тата Виталий Кондратьева асăнса ирттерекен Кубокра вăл командăри юлташĕсемпе – Сергей Кузнецовпа, Андрей Беловпа тата Семен Машановпа – улттăмĕш хут турнирăн улшăнми лидерĕ пулса тăнă.

Уйрăм зачетра 5-мĕш класлă йывăрлăхлă дистанцире 2-мĕш вырăн йышăннă. Çыхăнура çак маршрутпа вĕсем Сергей Кузнецовпа кĕмĕл медале тивĕçнĕ. Палăртма кăмăллă, республикăн пĕрлештернĕ команди турнирăн     1-мĕш йĕркине йышăннă тата куçса çÿрекен Кубока хăйĕн аллинчех хăварнă.

Шупашкар каччине Александр Кочкина хамăр районта иртекен массăллă йĕлтĕр чупăвĕнче çулсеренех курма пулать. Кашнинче тенĕ пекех вăл пьедестал çине хăпарма тивĕçет.

Чăннипе, Александр – профессионаллă байдарçă. Çак кунсенче кăна вăл Мускавран ветерансем хушшинче каноэ-марафон енĕпе иртнĕ Европа Кубокĕнчен таврăннă. 35 çултан аслăрах хĕрарăмсемпе арçынсем программăн 23 енĕпе ăмăртнă.

Александр Кочкин, байдаркăпа тата каноэпе сулăсемпе ывăсса ишессипе «Энергия» спорт шкулĕн тренерĕ, икĕ медале тивĕçнĕ. Пĕрне – «кĕмĕле» – вăл Мускаври ĕçтешĕпе Дмитрий Базютăпа 20 километрти ишевре, теприне – «бронзăна» – Мускав спортсменкипе Татьяна Петровапа хутăш ишевре.

Хальхи вăхăтра Александр пирĕн районта, Кÿлхĕрринче, пурăнать. Кунти кÿлĕре тренировкăсем куллен ирттерет.

Светлана ЧИКМЯКОВА.