Шел те, ковид тĕлĕшпе лару-тăру çивĕчленсе пынине пурте ăнланасшăнах мар. Акă, обществăлла вырăнсенче те çынсем маска тăхăнма васкамаççĕ. Иртнĕ кĕçнерникунхи пасарта та сутуçăсемпе туянакансем хушшинче сыхлăх мерисене пăхăнакансем сахалрах пулни курăнчĕ. Вĕсем, ахăртнех, хаяр чир манран пăрăнса иртĕ, тесе шутлаççĕ ĕнтĕ. Тунтикун район администрацийĕн залĕнче Вăрнар районĕнче коронавирус сарăлассине асăрхаттарас тĕлĕшпе оперативлă штабăн ларăвне ирттернĕ.

Пĕтĕмĕшле лару-тăрупа район тĕп больницин тĕп врачĕ Сергей Илюткин паллаштарнă. Пандеми пуçланнăранпа районти 881 çын коронавирус инфекцийĕпе чирленĕ. Уйрăмах иртнĕ уйăхра пациентсен йышĕ пысăк пулнă – 140 çынна регистрациленĕ. Ку уйăхри кăтартусем те пĕчĕк мар. Тепĕр тесен, июль варрине те çитмен-ха. Хальхи вăхăтра 131-ен сипленеççĕ, стационарта – 67 çын.

Тĕп больницăн ковидпа кĕрешмелли корпусĕнче вăрнарсем кăна мар, ытти районтан килнисем те сипленеççĕ. Пациентсем хушшинче прививка тутарнисем те пур, анчах та вĕсем чире хăвăртрах парăнтараççĕ. Тĕнчере коронавирусăн тĕрлĕ штамĕсем – «инди», «дельта» – сарăлса пыраççĕ. Уйрăмах «дельта» текенни çынна ытларах сиенлет. Телее, ку штама Чăваш енре тупса палăртман.

Сергей Владимирович çирĕплетнĕ тăрăх, тунтикун тĕлне вакцинăн пĕрремĕш компоненчĕпе прививка тутарнисем 5015-ĕн шутланнă , иккĕмĕшĕпе – 3964 çын.

– Вакцинацирен хăрамалла мар, вăл чăн хÿтлĕх пулнине кашнин ăнланмалла. Ял тăрăхĕсен администрацийĕсен пуçлăхĕсен, тĕрлĕ тытăмри депутатсен халăх хушшинче ăнлантару ĕçне вăйлатмалла, – тенĕ тĕп врач.

Сергей Илюткин ватăсене вакцинацилессине пысăк тимлĕх уйăрма ыйтнă. 65 çултан иртнисен тата аслăраххисен 30 процентне ковидран прививка тунă ĕнтĕ.

Сăмах май, асилтерни вырăнлă – район тĕп больници тата «Август» Фирмăн филиалĕ çумĕнчи прививка кабинечĕсенче коронавирусран вакцинаци тăваççĕ. Кунсăр пуçне икĕ мобильлĕ бригада пур.

Çапах та хăшпĕр граждансен яваплăх туйăмĕ пысăк. Акă, иртнĕ шăматкун район тĕп больницинче 30 яхăн çын прививка тутарнă-тăк, ку тунтикун вара кăтарту самаях ÿснĕ. Вакцинациленнисен йышĕнче полицейскисем, учительсем ытларах пулнă.

Елена ПОРФИРЬЕВА.