Вăрнар районĕнче кĕçнерникун тÿрех икĕ вице-премьер – ЧР вĕрентÿпе çамрăксен политикин тата ял хуçалăх министрĕсем Алла Салаевапа Сергей Артамонов – тата Шупашкар хулин администрацийĕн пуçлăхĕ Алексей Ладыков пулчĕç. «Вăрнарти аш-какай комбиначĕн ĕçĕ-хĕлĕпе паллашрĕç. Калас пулать, ĕçлĕ çулçÿреве çавăн пекех Чăваш ен Патшалăх Канашĕн депутачĕ, «Вăрнарти аш-какай комбиначĕ» агрохолдингăн президенчĕ Юрий Попов, «Вăрнарти аш-какай комбиначĕ» акционерсен обществин директорĕсен Канашĕн председателĕ Владислав Попов хутшăнчĕç.

Агрохолдинг – республикăра малта пыракан предприятисенчен пĕри. Çулсерен çĕршыври конкурссене, куравсене хутшăнать. Паха продукцишĕн пысăк хака тивĕçет. Ĕçлĕ çулçÿревпе килнисем комбинатăн аш-пăш тирпейлекен цехĕсене çитсе курчĕç. Кунта ĕç вĕресе тăрать. Цехра тăрăшакан кашни çын хăйне шанса панă тивĕçе чыслăн пурнăçлама тăрăшни курăнчĕ. Агрохолдинг президенчĕ Юрий Попов ĕç хăвачĕ çултан çул ÿссе пынине палăртрĕ. Пĕр цехĕнче хăнасем вăрнарсен кăлпассине тутанса пăхма пултарчĕç. Продукци пахалăхлă пулнине çирĕплетрĕç.

Цехсенчи ĕç-хĕлпе паллашнă хыççăн вице-премьерсем агрохолдингра тимлекенсемпе тĕл пулчĕç. Аш-какай комбиначĕ çинчен видеофильм пăхрĕç. Пĕтĕмпе предприятире пине яхăн çын тăрăшать. Сысна, мăйракаллă шултра выльăх ĕрчетессипе те, ÿсентăран отраслĕнче те курăмлă тимлеççĕ. Юрий Попов комбайнсем вырма ĕçĕсене тытăннине кăмăллăн пĕлтерчĕ.

Предприяти аталану çулĕпе пыни çынсене ĕç вырăнĕсемпе тивĕçтерет. Анчах та хăшпĕр ял хуçалăх организацийĕсенче специалистсем çитменни – çивĕч ыйту.

– Республикăри пĕр пысăк хуçалăхра агроном кирлĕ. Шалăвĕ 70 пин тенкĕ пулсан та хальлĕхе специалист тупăнман-ха, – пĕлтерчĕ ял хуçалăх министрĕ.

Çамрăксене тăван тăрăхра юлма илĕртес тесен ялсенче хăтлă условисем туса памалла.

– Хастартарах, пуçаруллăрах пулмалла. Патшалăх хамăр пурăнакан тăрăха хăтлăлатма укçа-тенкĕ çителĕклĕ уйăрать. Чи кирли – муниципалитетсен проектсем хатĕрлеме ÿркенмелле мар, – терĕ Сергей Артамонов.

Акă, «Пуçаруллă бюджет» программăна пурнăçланăран чылай ялăн сăн-сăпачĕ лайăх енне улшăнчĕ. Çулсене юсаса çĕнĕрен такăрлатрĕç. Патшалăх пулăшăвĕ тĕрлĕ енлĕ. Ял бизнесне аталантарма пуçаруллă çынсене курăмлă тĕрев параççĕ. Фермерсен шкулĕнче те килĕшнĕ ĕç енĕпе пĕлĕве тарăнлатма пулать. Тÿлевсĕрех вĕрентеççĕ. Ял хуçалăх пĕлтерĕшлĕ объектсене çĕклеме, техника туянма субсиди уйăрни те пысăк пĕлтерĕшлĕ. 3 процентлă ял ипотекине пула кил-çурт условийĕсене лайăхлатма май пур.

Тĕлпулура Алла Салаева вице-премьер яш-кĕрĕмпе хĕр-упраçа аталану çулĕпе пыракан ял хуçалăх предприятийĕсене тăтăшах экскурсисене илсе çÿреме сĕнчĕ.

– Сăмахран, шкулта вĕренекенсене Вăрнарти аш-какай комбиначĕ çинчен ÿкернĕ видеофильма   мĕншĕн кăтартас мар? – терĕ вăл. – Çамрăксем те аграри профессийĕсемпе ытларах кăсăкланĕç.

Вĕрентÿ министрĕ хальхи вăхăтра муниципалитетсен сăн-сăпачĕ лайăх енне улшăнса пынине, шкулсенче, садиксенче тĕплĕ юсав ĕçĕсем ирттерессипе тĕллевлĕ тăрăшнине çирĕплетрĕ. Акă, 1-мĕш вăтам шкул çумĕнче хушма çурт çĕклемелле. Палăртмалла, ку шкула Алла Салаева пĕрремĕш хут иртнĕ çул килнĕччĕ. Лару-тăру çивĕч тăнă. Подрядчик айăпне пула ачасем авăн уйăхĕн 1-мĕшĕнче шкула каяйман.   Вĕрентÿ министрĕ шкулта юсав ĕçĕсем хăвăртрах вĕçленччĕр тесе самаях вăй хума тивнине каларĕ. Тăрăшни паха çимĕç панă. Çĕнĕ вĕренÿ çулĕ палăртнă вăхăтра пуçланнă. Çавăн пекех вице-премьер садиксен, шкулсен çумĕнчи территорисене те хăтлăлатассине пысăк тимлĕх уйăрмалла, терĕ.

Шел пулин те, ялсенче кадрсем аграрлă хуçалăхсенче кăна мар, вĕренÿ, сывлăх учрежденийĕсенче те çитмеççĕ. Вице-премьерсем çивĕч ыйтăва татса парасси пĕрле тăрăшмалли ĕç пулнине çирĕплетрĕç. Алла Салаевăпа Сергей Артамонов техникумсен, колледжсен, университетсен ĕçĕ-хĕлĕпе кăсăклансах тăраççĕ. Студентсемпе тĕл пулаççĕ.

Шупашкар хулин администрацийĕн пуçлăхне Алексей Ладыкова та сăмах пачĕç. Вăл ача чухне Вăрнар районне час-часах килсе çÿренине пĕлтерчĕ. Поселокра унăн аслашшĕпе асламăшĕ пурăннă. Каласа хăвармалла, унăн асламăшĕ шăпах та аш-какай комбинатĕнче тĕп бухгалтерта тимленĕ. Ку ĕçре 10 çул ытла тăрăшнă. Алексей Ладыков комбинатра тăрăшакансене ÿсĕм хыççăн ÿсĕм тума сунчĕ.

Вăрнар район администрацийĕн пуçлăхĕ Андрей Тихонов район аталанăвĕпе паллаштарчĕ. Ырă улшăнусене, пурнăçламалли задачăсене палăртрĕ. Кăçал район 10,5 млн тенкĕлĕх грант çĕнсе илнĕ. Çак суммăпа Советски урамĕнчи çула юсĕç тата тротуарсем сарĕç. Ĕç планĕсем тата пысăк.

Ял хуçалăх министрĕ   Вăрнар тăрăхне пысăк квалификациллĕ специалистсем килччĕр тесен вĕсем валли аренда кил-çурчĕсем çĕклессипе тăрăшмаллине çирĕплетрĕ. «Малашлăх пирки халех шухăшламалла. Кадрсем пĕтĕм ыйтăва татса параççĕ тенине яланах асра тытмалла», – терĕ вăл.

Пурне те хумхантаракан çивĕч ыйтусенчен пĕри – коронавирус инфекцине сарăлма чарасси. Сывлăха упрас тесен сумлă хăнасем ковидран вакцинациленме сĕнчĕç. Вĕсем хăйсем те прививка тутарнă ĕнтĕ.

Тĕлпулура ĕç çыннисене те сăмах пачĕç. Вĕсем хăйсене кăсăклантаракан ыйтусене çĕклерĕç.

Елена ПОРФИРЬЕВА.