Куратпăр, пĕлтĕртенпех нуша кăтартакан коронавирус вăйне ниепле те чакарасшăн мар. Лару-тăру çĕршыври мĕнпур регионта каллех кăткăсланчĕ. Нумайăшĕнче чару мерисене каялла тавăраççĕ. Чирĕн черетлĕ «хумĕ» хупласа хучĕ, теççĕ специалистсем.

Хамăр районта та, акă, коронавирус ернисен шучĕ ÿснĕ. Ятарлă сиплев кирлĕ йывăр тĕслĕхсем йышланнăран Вăрнар тĕп больницин стационарĕнче июльте каллех ковид-центр уçма тивнĕ. Ыйту çивĕчленни ăнсăртран мар пулĕ. Хамăрах сыхлăха çухатрăмăр мар-и? Унчченхи «хум» хыççăн лару-тăру кăшт лăплансанах маскăсем тăхăнмалли, социаллă дистанци тытмалли тата ытти хÿтĕлев мелĕсем пирки хăвăрт мантăмăр. Чирĕ вара усал та чее йышши: тимлĕхе чакарсанах хăйĕн çинчен тата хăрушăрах аса илтерет.

Инфекци сарăласлăхне чакармалли шанчăклă мел – май килнĕ таран нумайрах çынна вакцина туни, теççĕ специалистсем. Хăйсен, тăванĕсен сывлăхĕшĕн пăшăрханакансем чăнах та çак ĕçĕн кирлĕлĕхне тÿрех ăнланчĕç. Анчах та вакцинацие сивлекенсем, ыттисене те ăна хирĕçлеме хистекенсем те пур-ха. Çавăнпа та халăха пăтраштаракан шухăшсене сирессипе, вакцинацин хăрушсăрлăхне ăнлантарассипе те тăрăшма тивет.

Ку пĕлтерĕшлĕ ĕçе депутатсем хастар хутшăнсан тата тухăçлăрах пулмалла, паллах. Вĕсен, халăх ыйтăвĕсемпе ĕçлекенсен, сăмахĕсем район çыннисемшĕн витĕмлĕ пулĕç. Çак шухăша район администрацийĕн пуçлăхĕ Андрей Тихонов ытларикун район Пухăвĕн депутачĕсен корпусĕпе ирттернĕ канашлура палăртнă. Унта çавăн пекех ял-хула поселенийĕсен, хăшпĕр предприяти-организацисен ертÿçисем те хутшăннă. Калаçу, тĕпрен илсен, хамăр тăрăхри пандеми лару-тăрăвĕ тата вакцинаци тавра пынă. Кун пирки район пресс-служби пĕлтерет.

– Депутатсем, вырăнти пуçлăхсем – общество шухăшне йĕркелеме пулăшакансем. Çавăнпа та эсир çынсем патне вакцинаци коронавирусран шанчăклă хÿтĕленмелли пĕртен-пĕр мел пулнине çитерме, хăвăр тĕслĕхпе çирĕплетме тивĕçлĕ, – тенĕ Андрей Владимирович.

Депутатсемпе поселенисен ертÿçисене халăхпа тĕл пулма, прививкăн лайăх енĕсем çинчен пурне те ăнланмалла каласа пама, унăн сиенĕ пирки ахальтен шутласа кăларнă «юмахсене» уçăмлатма сĕннĕ. Аслă ÿсĕмри çынсене уйрăм тимлĕхе илмелле% вĕсен те, обществăра пĕршухăшлăх пулманран, вакцинаци тĕлĕшпе иккĕленÿ çуралать. Нумайăшĕ ачи-пăчи е пĕлĕшĕ каланине итлесе прививкăран хăрать. Чылайăшне интернет та «çĕттерет»% унта прививка организма аркатуллă сиен кÿрет текен тĕрĕслемен, ултавлă информаци тем чухлех. Аслă çынсене вара вакцинаци питĕ кирлĕ. Мĕншĕн тесен, çулĕсене кура ытти чир-чĕр те аптратнăран, коронавирус ерсен шăпах та вĕсем уйрăм хăрушлăхра. Прививка вара чир йывăррăн иртессинчен, япăх вĕçленессинчен хÿтĕленме май парĕ, теççĕ тухтăрсем.

Андрей Тихонов район çыннисем хăйсем суйланă депутатсен сĕнĕвне шута илессине шаннине пĕлтернĕ. Тĕлпулусене медицина, социаллă тивĕçтерÿ, ытти сфера специалисчĕсене те хутшăнтарасшăн. Пĕрлехи ĕç паха «çимĕç» паратех, мĕншĕн тесен çынсен ырлăхĕшĕн, сыхлăхĕшĕн тăрăшасси – мĕнпур шайри влаçăн тĕп тĕллевĕ.

Ирина ЯКОВЛЕВА.