Вăрнар районĕн ирĕклĕ кĕрешÿçисем пысăкрах та пысăкрах пьедесталсене çĕннине палăртма уйрăмах кăмăллă. Хальхинче хĕрсем Раççей турнирĕнче палăрнă.

Раççей çамрăкĕсен çуллахи спартакиади иртнĕ эрнере Çĕнĕ Шупашкарта пулнă. Пирĕн район хĕрĕсем Атăлçи федераци округĕн пĕрлештернĕ командине тăваттăн кĕнĕ. Ку питĕ аван пулăм. Мĕншĕн тесен кавир çине спортсменсем вунă виçе категорийĕнче тухнă, вăрнарсем – тăваттăн тан.

Мăн Явăш хĕрĕ Екатерина Кошкина пиĕ чаплă техника, ăсталăх кăтартнă. Ăна хăйĕн виçинче çĕнекен пулман, вăл ылтăн медале тивĕçнĕ. Унсăр пуçне, маттур хĕрача спорт мастерĕн нормативне те пурнăçланă.

Командăри юлташĕ, Вăрнар хĕрĕ Милена Федорова, çĕнтерÿ пьедесталĕн виççĕмĕш пусми çине хăпарма тивĕçнĕ.

Поселок хĕрачи Анастасия Максимова финала тухнă, анчах та 3-мĕш вырăншăн пынă тытăçăва выляса янă.

Сумлă ăмăртăва Кивьял Хапăс хĕрĕ Анастасия Краснова та хутшăннă, шел, ăна хальхинче ăнăçман.

Ку хĕрсем пурте ирĕклĕ кĕрешÿри малтанхи утăмсене Вăрнарти ачасемпе çамрăксен спорт шкулĕнче тунă, ăсталăха Виталий Трофимов тата Юрий Львов пултаруллă тренерсем патĕнче туптанă. Спортри çыхăну татăлман-ха – преподавательсем хăйсен воспитанникĕсен çитĕнĕвĕсемпе кăсăклансах, пулăшсах тăраççĕ.

Светлана ЧИКМЯКОВА.