Маттур чăваш хĕрарăмĕсем çемье вучахне те упраççĕ, хăйсен ĕçĕнче те тÿрĕ кăмăлпа тăрăшаççĕ. Поселокра пурăнакан Мира Леонидовна Николаева ырă сăмахсене чăннипех тивĕçлĕ.

Вăл Вăрнар район тĕп больницин хирурги уйрăмĕн медсестри. Июлĕн 1-мĕшĕнчен çак уйрăмра ковид-центр йĕркеленĕ. Мира Леонидовна пациентсене хăрушă чиртен сипленме пулăшас тесе ырми-канми ĕçлет. Гиппократ тупине яланах асра тытать.

Пандеми тапхăрĕнче лару-тăру çăмăл мар. Оперштаб пĕлтерĕвĕсене вуласан чун сÿлетсе илет.

– Медицина ĕçченĕсем пациентсене чире парăнтарма пулăшас тесе мĕнпур вăйран тăрăшаççĕ, – терĕ Мира Леонидовна. – Вĕсем сывалнине курсан вара чĕре савăнăçпа тулать.

Вакцинаци туни коронавирусран хÿтĕлет. Мира Леонидовна сывлăха упрас тесе ĕçтешĕсем пекех прививка тутарнă. Вакцинаци хыççăн хăйне аван туйнă. Ковид-центрта тимленĕ май вăл та вăхăтăн-вăхăтăн кирлĕ анализсене парса тăрать.

Мира Николаеван професси ăсталăхĕ пысăк. Медицина ĕçĕнче вăл 39 çул ытла вăй хурать. Эмелпе кăна мар, ырă, ăшă сăмахсем каласа çынсене сиплеме, пурнăçпа хавхалантарма пĕлет.

– Мана пĕр темиçе çул каялла хирурги уйрăмĕнчи ача кĕтекен хĕрарăмсем валли ятарласа уйăрнă палатăна хучĕç. Эпĕ   Мира Леонидовна дежурствăна килессе чăтăмсăррăн кĕтеттĕм. Вăл калаçма тытăнсанах ыратни иртсе каятчĕ, чĕрене çу сĕрнĕ пек туйăнатчĕ. Ирхи процедурăсем ирттериччен пациентăн кăмăлне çĕклетчĕ. Мира Леонидовна пирки ытти хĕрарăм та çаплах çирĕплетĕ, – терĕ пĕлĕшĕм Ирина Сергеева.

Медсестран ячĕ те асамлăн янăрать. Вăл «мир» сăмахран пулнă, «килĕштерме пĕлекен» тенине пĕлтерет. Мира Николаева çуралнă тăрăх – Çĕрпÿ районĕнчи Тавăшкасси ялĕ. Ашшĕпе амăшĕ хĕрпĕрчи çут тĕнчене килсен питĕ хĕпĕртенĕ, вăл ырă кăмăллă, тарават çын пултăр тесе пепкене «Мира» ят панă.

Ача чухнех Мирăн шур халатлă ĕçчен пулас килнĕ. Çунатлă ĕмĕчĕ пурнăçлансан тăван район больницинче тăрăшма тытăннă. Кăтартуллă ĕçленĕшĕн çамрăк хĕр «Атăл шуçăмĕсем» культурăпа кану çуртне кайма тивĕçнĕ. Кунта Мира Леонидовна пулас мăшăрĕпе – пирĕн районти «Самолет» колхозăн маттур ĕçченĕпе – паллашнă. Пĕр-пĕрне юратакансем кĕçех çемье çавăрнă. Икĕ ачана кун çути парнеленĕ. Вĕсем пурнăç çулĕ çине тăнă ĕнтĕ. Хĕрĕ бухгалтерта, ывăлĕ менеджерта тăрăшаççĕ.

Мира Николаева юратнă мăшăр, хаклă амăшĕ кăна мар, ăшпиллĕ кукамăшĕпе асламăшĕ те. Унăн куç тулли виçĕ мăнук çитĕнет.

– Асанне-кукамай, ырă кăмăллă вăл пĕрмай, – теççĕ иккен мăнукĕсем.

Мира Леонидовна ачапчан тавракурăмĕ пĕчĕкренех аталантăр тесе тăрăшать. Вăл вĕсене «Çĕнтерÿ çулĕ» тата «Георгиевский листок» хаçатсемпе туслаштарма ĕлкĕрнĕ ĕнтĕ. Акă, садике çÿрекен Миша час-часах мĕн çырнине вуласа пама ыйтать иккен. Ача хаçатсенчи сăнÿкерчĕксене пăхма юратать. Шăпăрлан халех фотограф ĕçĕпе кăсăкланать имĕш.

– Мăнукăмсене те çитĕнсессĕн юратнă профессие алла илсе телей тупма, çĕршыва юрăхлă çын пулма сунатăп, – терĕ Мира Леонидовна.

Елена ПОРФИРЬЕВА.